Elimizdiń Batysyndaǵy barlyq oqý polıgondarda bólimshe, ekıpajdar quramymen qarqyndy jaýyngerlik sabaqtar ótýde. Bólimshelerdi (eseptoptardy) jáne ekıpajdardy daıyndaý boıynsha sabaqtar bólimsheler komandırleriniń basshylyǵymen ótkizilip, shilde aıynyń sońyna deıin jalǵasady. Atalǵan kezeńde áskerı qyzmetshiler mamandyq boıynsha jeke daıyndyq barysynda alǵan ártúrli urysta jáne jaýyngerlikke barynsha jaqyndatylǵan jaǵdaılarda bólimshe quramynda kásibı mashyqtaryn jetildirýde. Oqytý barysynda negizgi kúsh-jiger bólimsheler quramynda áskerı qyzmetshilerdi is-qımylǵa daıyndaýǵa jáne urysta shtattyq qarý-jaraq pen áskerı tehnıkany sheber ári tıimdi paıdalanýǵa jeke quramnyń dalalyq mashyǵyn jetildirýge baǵyttalǵan.
Sonymen qosa, osy aralyqta áskerı qyzmetshiler tanys emes aımaqtaǵy jaýyngerlik áreketterin, bólimshelerdiń oq atysyn basqarýdy, áskerıtehnıkadan qozǵalysta oq atýdy pysyqtaıdy.
- Qarańǵy ýaqyttaǵy atys jattyǵýlary barysynda túnde kórý quraldary qoldanylady. Atqyshtar ASELSAN qurylǵysyn qoldansa, tankishiler TVN-5 quralyn, BTR ekıpajdary mashına komandırlerine arnalǵan TKN-3 jáne júrgizýshi-mehanıkterge arnalǵan TVNE-4B qurylǵylaryn paıdalanady. Bunyń barlyǵy jaýyngerlik daıarlyq úrdisin meıilenshe sapaly etýge kóp septigin tıgizedi, deıdi «Batys» óńirlik qolbasshylyǵy áskerleri qolbasshysynyń jaýyngerlik daıarlyq jónindegi orynbasary polkovnık Jenıs Maralov.
Atys qarýlarynan túngi ýaqyttaǵy oq atý kúndizgi ýaqyttan qaraǵanda áldeqaıda ózgeshe. Túngi ýaqytta olardyń kózdeýleri, baǵdarlardy tabý qıyn bolady. Oǵan qosa, sarbazdarǵa degen psıhologııalyq aýyrtpashylyq bolýy múmkin. Bólimshelerdi daıyndaýdyń sheshýshi kezeńinde jaýyngerlik oq atýlar ótkiziledi.
Mańǵystaý oblysy
