Kelissózder nátıjesinde EQDB-jáne Shymkent qalasynyń ákimdigi arasynda «Jasyl qalalar» iri halyqaralyq baǵdarlamasyna qosý týraly ózara túsinistik týraly memorandýmǵa qol qoıyldy. Osylaısha, Shymkent qalasy ekologııalyq tartymdylyǵyn arttyrýǵa baǵyttalǵan jobalardy júzege asyrý maqsatynda beriletin EQDB-niń qomaqty qarjylyq qoldaýyna ıe bolǵan Qazaqstandaǵy birinshi jáne álemdegi 31-shi qala boldy. Bolashaq jobalardyń quny 100 mln AQSh dollaryn quraıdy.
Osy baǵdarlama aıasynda aldyńǵy qatarly ekologııalyq tehnologııalar engiziletin bolady. Qarjylyq resýrstarynan basqa EQDB «Jasyl qala» is-áreket josparyn ázirleý jáne iske asyrýda qoldaý kórsetetin bolady. Sonymen birge, ınvestısııalyq baǵdarlamalardy anyqtaýda jáne qosymsha ınvestısııalardy tartýda kómek kórsetetin bolady.
Kelissózder barysynda taraptar energııany únemdeıtin lampalardy ornatý arqyly qalany jaryqtandyrý jáne tez damyp kele jatqan Shymkent qalasynyń barlyq talaptaryna jaýap beretin jańa tazartý qondyrǵylaryn salý boıynsha jobalardy qarjylandyrý jáne olardy iske asyrý máselelerin talqylady.
Sonymen qatar, EQDB basshylyǵy pılottyq rejımde júzege asyrylatyn, keıinnen osy tájirıbe Qazaqstannyń basqa iri qalalarynataratylýy josparlanǵan jańa tazartý qondyrǵylaryn salý boıynsha joba úshin áleýetti alǵashqy qala retinde Shymkentti qarastyryp otyr.
Kezdesý barysynda Ǵ.Ábdirahymov jyldyń aıaǵyna deıin EQDB ókilderin ekijaqty yntymaqtastyqtyń keń aýqymdy máselelerin talqylaýdy aıaqtaý jáne Shymkent qalasynyń mańyzdy áleýeti bar, onyń ishinde ekonomıkanyń qarqyndy damyp kele jatqan týrızm, jeńil jáne azyq-túlik ónerkásipteri sekildi salalarymen tanysý úshin Shymkent qalasyna shaqyrdy.
Álemdik «Jasyl qalalar» jobasy – EQQDB baǵdarlamalarynyń negizgi quraly. Joba qalalardyń turaqty damýyndaǵy strategııalyq maqsattarǵa qol jetkizýge kómektesedi. Buǵan qosa joba aıasynda ekologııalyq problemalardy – aýanyń lastanýy, jerdi paıdalaný, ortalyq jylý júıesi, kólik keptelisteri, qaldyqtardy zalalsyzdandyrý, sýmen jabdyqtaý jáne káriz júıesi, sý resýrstaryn paıdalaný máselelerin sheshýdiń ınvestısııalyq jobalary men is-sharalary qarastyrylǵan.
Sonymen birge issapar barysynda Shymkent qalasynyń ákimi Ǵ. Ábdirahymov Qazaqstan Respýblıkasynyń Ulybrıtanııa jáne Soltústik Irlandııa Birikken Koroldigindegi Tótenshe jáne О́kiletti Elshisi Erlan Ydyrysovpen kezdesti.
Kezdesý barysynda taraptar brıtandyq ýnıversıtetiniń qatysýymen Shymkent qalasynda jańa halyqaralyq joǵarǵy oqý ornyn ashý jaıyn talqylady. Jospar aıasynda onda IT salasy men sáýlet jáne dızaın, meıramhana isi jáne qonaq úı bıznesi menedjmenti, sondaı-aq ekonomıkaǵa qajetti mamandyqtar boıynsha bilim beriledi.
