Jas qalamgerler maqalalarynda aǵa gazettiń ǵasyr jylnamasy bolýymen qatar, halqymyzdyń ulttyq qundylyqtaryn saqtaýǵa, ana tilimizdiń – memlekettik tilimizdiń qoldanys aıasyn keńeıtýge atsalysqan, qazaq mektepteri azaıyp, qazaq tili esikten qarap qalǵan jyldary onyń muńyn muńdaǵan kúreskerligin kórkem tilmen jetkizýge tyrysqan. Gazettiń eski tigindisinen til týraly ár jyldary jazylǵan maqalalardy mysalǵa alyp, shyǵarmalaryn jandandyra túsipti.
Baıqaý jeńimpazdaryna júlde tapsyrý saltanatyna oblystaǵy buqaralyq aqparat quraldary ókilderi men oqyrmandar qatysty. Oblystyq tilderdi damytý basqarmasynyń basshysy Gúljan Meńdekenova qazaq jýrnalıstıkasynyń qara shańyraǵy – «Egemen Qazaqstan» gazetiniń mereı toıymen quttyqtady.
«Memlekettik tildiń damýyna «Egemen Qazaqstan» gazetiniń qosqan ólsheýsiz úlesin nasıhattaý maqsatynda «Til tarıhy: júz jyldyq jylnama» baıqaýyn ótkizýdi jón dep taptyq. «Egemen» qazaq tiliniń damýyna atsalysýymen de erekshelenedi. Ol qazaq tili tóte jazý, latyn, kırıll qaripterine kóshý kezinde jańa álipbıdi nasıhattaý, oqyrmandardy oǵan beıimdeý jumystarynyń kóshbasynda boldy. Qazir elimizde qazaq álipbıin latyn qarpine kóshirý jumysy qanat jaıyp otyr. Munda da aǵa basylym aldymen gazettiń atyn, taqyryptaryn, odan keıin maqalalardy latyn qarpimen berýdi bastap, úlgi kórsetti», dedi Gúljan Ermashqyzy.
Baıqaýda «Egemen» keıipkeriniń izimen» nomınasııasy boıynsha Amangeldi aýdandyq «Amangeldi araıy» gazetiniń tilshisi Ánet Jumabekov jáne «Jas qalam» nomınasııasy boıynsha Lısakov qalalyq «Lısakovskaıa nov» gazetiniń tilshisi Aıman Qadyrhanova dıplommen jáne aqshalaı syılyqpen marapattaldy. Úshinshi oryndy alǵan Qostanaı qalalyq «Nash Kostanaı» gazetiniń tilshisi Aıagóz Kákimjanovaǵa dıplom men 50 myń teńge syılyq tapsyryldy. Ekinshi oryndy «QOSTANAI» telearnasynyń júrgizýshi-redaktory Nurqanat Buqabaev ıelendi, oǵan dıplom men 70 myń teńge tabys etildi. Birinshi oryndy oblystyq Qostanaı tańy gazetiniń tilshisi Qasqyrbaı Qoıshymanov jeńip alyp, dıplom jáne 100 myń teńge syılyqpen marapattaldy.
Qostanaı
