Kezdesý barysynda Memleket basshysy Qazaqstan men Fransııa arasynda senimdi ekijaqty yntymaqtastyq ornaǵanyn, ásirese, saýda-ekonomıkalyq jáne saıası salalarda zor múmkindikter baryn atap ótti.
– Biz Fransııany Eýropa Odaǵy sheńberindegi negizgi seriktes retinde qarastyramyz. EO Qazaqstannyń basty saýda seriktesi bolyp tabylady. Ekijaqty saýda kólemi 4,5 mıllıard dollarǵa jetti. Al Fransııadan el ekonomıkasyna tartylǵan tikeleı ınvestısııalar kólemi 15 mıllıard dollardan asty, – dedi Qasym-Jomart Toqaev.
Memleket basshysy Qazaqstanda jumys istep jatqan fransýz kompanııalarynyń tabysty qyzmetin atap ótip, Fransııa mınıstrine elimizde olardyń tıimdi jumys isteýi úshin barlyq jaǵdaı jasalatynyn aıtty.
B.Le Mer Qazaqstan Prezıdentine jyly qarsy alǵany úshin alǵysyn bildirip, Fransııa men Qazaqstandy kópjyldyq ózara tıimdi strategııalyq áriptestik baılanystyratynyn atap ótti. Fransııanyń Ekonomıka jáne qarjy mınıstri eki el arasyndaǵy ózara jemisti is-qımyldardy barynsha arttyrýǵa nıettestik bildirdi.
Sońynda Memleket basshysy Fransııa kóshbasshysy Emmanıýel Makronǵa sálem joldap, izgi tilegin bildirdi.
