Jazasyn ótep jatqan jandar alǵash ret uly aqynnyń jyrlaryn jatqa oqyp, ózara synǵa tústi. Kesh taý tulǵamyzdyń 175 jyldyǵyna oraı uıymdastyryldy.
Sahnaǵa birinshi bolyp kóterilgen Danııar Rahymov “Senbe jurtqa, tursa da qansha maqtap” óleńin naqyshyna keltirip oqyp berdi.
«Babamyzdyń qaı óleńin alsaq ta maǵynasy óte tereń. Adamdy eriksiz oılandyrady. Ásirese, ómir, qoǵam jaıly óleńderi janyma erekshe jaqyn. Azamattyq kózqarasym múldem ózgerdi. Esirtki satyp, 7 jylǵa temir torǵa toǵytylǵanyma qatty ókinemin. Jastarǵa ótinishim, týra joldan eshqashan adaspańdar», deıdi Danııar.
Basqa da jazasyn óteýshiler Abaıdyń oı-tolǵaýlarynan, naqyl sózderinen úzindiler keltirip, adamzat balasynyń ǵumyrynyń qysqalyǵy, mahabbat, dostyq, jastyq shaqtyń azǵantaı ýaqyt ishinde ótip ketetindigi týraly ádemi mánermen jetkize bildi. Birqatary “Jaz”, “Ǵylym tappaı maqtanba” syndy óleńderimen, qara sózderimen mektep qabyrǵasynda tanysqan eken.
ES-164/3 túzetý mekemesi bastyǵynyń tárbıe jumysy jónindegi orynbasary Rústem Rahmetovtyń sózine qaraǵanda, buryn-sońdy ótkizilmegen Abaı oqýlarynyń tusaýkeseri jaqsy taǵylym qaldyrǵan tárizdi. Mekeme janynda jumys isteıtin 8 myń kitap qory bar kitaphanada qazaqtyń tanymal aqyn-jazýshylarynyń shyǵarmalary az emes kórinedi.
Soltústik Qazaqstan oblysy
