A. Erjanovtyń aıtýynsha, ındýstrııalandyrý baǵdarlamasyn iske asyrý jyldarynda mashına jasaý ekonomıkanyń eń serpindi damyǵan salalarynyń birine aınaldy: ondaǵy óndiris kólemi 3 esegege jýyq ulǵaıtyldy jáne 2018 jyly 1 trln teńgeden asty.
«Atalǵan kezeńde jalpy somasy 367 mlrd teńgege 128 joba paıdalanýǵa engizildi. Osy jyly 54 mlrd tg somasyna 10 jobany iske qosýdy josparlap otyrmyz», dedi vıse-mınıstr.
Júıelik máselelerdi sheshý, salany damytý boıynsha rezervterdi anyqtaý jáne iske asyrý maqsatynda QR IIDM «Qazaqstannyń mashına jasaýshylar odaǵy» ZTB-men birlesip, Mashına jasaý salasyn damytýdyń 2019–2024 jyldarǵa arnalǵan Jol kartasyn ázirledi.
Barlyǵy Jol kartasynda 11 baǵytqa bólingen 57 is-shara kózdelgen. Jol kartasyn iske asyrý kezinde óndiris kólemi men eńbek ónimdiligin 2 esege ósirý, eksport kóleminiń 1,2 esege artýy kútilýde.
«Indýstrııa jáne ınfraqurylymdyq damý mınıstrligi ınvestorlarǵa qolaıly jaǵdaı týǵyzý, mashına jasaý ónimderin ázirleý jáne ilgeriletý boıynsha júıeli jumystardy retteıdi», dedi A. Erjanov.
Vıse-mınıstrdiń aıtýynsha, qazaqstandyq kásiporyndar óz óndiristerinde zamanaýı tehnologııalar men qural-jabdyqtardy qoldana otyryp, joǵary tehnologııalyq ónimderdi qurý prosesine jyldam qarqynmen qosylýda.
2018 jyldan bastap aýyl sharýashylyǵy mashınasyn jasaý salasynda óndiristiń ósýi baıqalýda, buǵan ónimdi ótkizý kezinde QQS tóleýden bosatý sekildi memlekettik qoldaý sharalary yqpal etti.
Indýstrııalandyrýdyń sońǵy jyldarynda temir jol mashınasyn jasaý belsendi túrde damı bastady. Sondaı-aq, taý-ken mashınasyn jasaý óndirisiniń ósýi baıqalady, bul taý-ken mashınasyn jasaý qurylymynyń 73%-yn alatyn burǵylaý jáne qazbaótkish mashınalarǵa arnalǵan qosalqy bólshekter óndirisiniń artýymen baılanysty. Mashına jasaý ónimderdiń keń nomenklatýrasyn ımportpen almastyrý esebinen munaı-gaz mashınasyn jasaý salasyn damytýdyń aıtarlyqtaı áleýeti baıqalady.
«Jalpy, mashına jasaý salasy ekonomıkamyzdy damytý boıynsha úlken áleýetke ıe. Shamamen $13 mlrd mashına jasaý ónimderiniń ımportyn, al otandyq óndiris $3 mlrd astam quraıdy. Jaqsy áleýet bar, sondyqtan osy baǵytta jumys isteýimiz kerek», dedi A. Erjanov.
