Oblys ákimdigi men «Otandastar qory» KEAQ ekijaqty memorandýmynyń nátıjesinde jazǵy demalysqa Mońǵolııanyń Ulan-Batyr qalasy, Qobda, Baı-ólke aımaqtarynan 80-ge jýyq bala muǵalimderimen birge atamekenge demalýǵa keldi.
Ustaz Baqytgúl Qonarbaıqyzynyń aıtýynsha, balalar kún saıyn bilikti jáne bilimdi ustazdardan dáris alyp, mádenı-sporttyq sharalarǵa qatysady. Atap aıtar bolsaq, osyndaǵy úzdik oqýshylardyń biri Allabergen Qurmethanuly О́lgeı qalasyndaǵy jalpy bilim beretin №1 mektepte oqıdy. Dzıýdodan eki dúrkin aımaq chempıony. Al kelesi bir oqýshy Muhammedálı Amankeldiuly el kóleminde mańyzdy jarys – matematıkadan ótetin «Mazalaı» olımpıadasynyń qola júldegeri bolsa, Qobylandy Erkinuly aǵylshyn tili, hımııa, bıologııa sekildi pán túrlerinen aımaqtyq olımpıada jeńimpazy.
Alda atajurtyna aıaq basqan oqýshylar Máshhúr Júsip kesenesine, Jasybaı batyrdyń eskertkishine taǵzym etedi. Baıanaýyldyń basqa da kórikti jerlerine saıahatqa shyǵady.
«Jyl saıyn alys-jaqyn shetelderde turyp jatqan qazaq otbasylarymen kezdesip, olardyń ul-qyzdaryn atamekenge tartý jóninde úgit-nasıhat júrgizemiz. Elge kelip, bilim alyp, turaqtap qalǵysy keletinder az emes», deıdi Dúnıejúzi qazaqtary qaýymdastyǵynyń Pavlodar oblystyq bólimshesiniń basshysy Bolat Zaýyt.
Pavlodar oblysy,
Baıanaýyl aýdany
