«Eshkimniń qoldaýynsyz, bilimi men sheberligi, aqjarqyn adaldyǵy,adamdarmen til tabysa biletin qasıeti arqasynda ótken jyldyń sáýirinde oblystyq Keńestiń tóraǵasy bolyp saılanǵan. Qaılasyn qoıa salyp, saıasatqa eleńdegen shahterleri ekonomıkalyq ereýildi qarý etken, býyrqanǵan Kýzbasty basqarý ońaı dep kim aıtar. Áljýaz, qabiletsiz bireý bolsa áldeqashan ornyn tastap júre berer. Ketkisi kelmese de, narazylar degenine jeter. Al Amangeldi ondaı bolmaı shyqty. Kóktemdegi ereýildiń sany jaǵynan úshinshi bolýy múmkin edi. Oǵan deıin shahterler tolqyp baryp, eki ret raıynan qaıtty. Kýzbass tynysymen jastaıynan tanys basshy eńbek adamdaryn qaýipti qadamnan saqtandyra bildi. Sońǵy ereýildiń jóni basqa. Oǵan ıtermeleýshiler de, tamyzdyqty úrleýshiler de kóp bolǵan….
Soǵan qaramastan kýzbastyqtardyń eldegi ahýalǵa narazylyǵy ádettegideı oblys basshysyna degen senimsizdikke ulasqan joq. Qaıta ólkeni, bylaı qoıǵanda, búkil Reseıdi ekonomıkalyq jáne saıası tuıyqtan shyǵarýdyń baǵdarlamasyn batyl usynǵan Amangeldi Moldaǵazyulyn qoldaýshylar qatary kóbeıe tústi».
«Sosıalıstik Qazaqstan» gazetiniń 1991 jylǵy 1 maýsymdaǵy sanyna shyqqan maqala. Avtory Tilekqabyl Boranǵalıuly.
