Batys Qazaqstan oblystyq polısııa departamenti jaz kezinde jasóspirimderge qatysty túrli quqyq buzýshylyqtyń aldyn alý maqsatynda «Kanıkýl» atty jedel aldyn alý sharasyn uıymdastyrdy. Bul rette, ásirese polısııanyń arnaıy esebinde turǵan, shyrqy jıi buzylatyn shańyraqtar erekshe baqylaýda boldy.
Polısııa qyzmetkerleri prokýratýra, bilim mekemeleri, Nur Otan partııasynyń oblystyq fılıaly jáne jastar uıymdarynyń qatysýymen bir apta boıy reıdtik sharalar uıymdastyryp, 246 ákimshilik quqyq buzýshylyqty anyqtaǵan.
– Reıd kezinde eń jıi kezdesken quqyq buzýshylyq – kámeletke tolmaǵan balalardyń saǵat 23.00 men 6.00 aralyǵynda ata-anasynyń qadaǵalaýynsyz úıinen tysqary júrýi boldy. Osyndaı 228 oqıǵa tirkeýge alyndy. Sondaı-aq 9 ata-anasy nemese zańdy ókili óziniń bala tárbıesine qatysty mindetin oryndamaǵany úshin jaýapqa tartylsa, 21 jasqa tolmaǵan jandarǵa alkogoldik ishimdik satqan 4 oqıǵa anyqtaldy, – deıdi BQO polısııa departamenti baspasóz qyzmetiniń mamany Álııa Naýryzǵalıeva.
Profılaktıkalyq sharalar kezinde kámeletke tolmaǵan 250 bala polısııa bólimshesine ákelingen. Onyń ishinde qylmystyq jaýapkershilik týraly 2 hattama toltyrylsa, 237 márte ákimshilik quqyq buzýshylyq tirkelgen. 11 balanyń qańǵybastyǵy anyqtalsa, 2 bala kámeletke tolmaǵandarǵa arnalǵan beıimdeý ortalyǵyna jiberilgen. 13 otbasy arnaıy tirkeýge qoıylǵan.
«Kámeletke tolmaǵan balalardy qadaǵalaýsyz qaldyrýdyń sońy keıde orny tolmas ókinishke uryndyryp jatady. Sondyqtan muqııat bolyńyzdar» dep eskertedi polısııa qyzmetkerleri. Osy jaz mezgilinde ǵana Batys Qazaqstan oblysynda 7 bala sýǵa ketip, kóz jumdy.
Batys Qazaqstan oblysy
