Qoǵamdyq qabyldaýda Ishki ister mınıstri Erlan Turǵymbaev azamattardy jeke-jeke qabyldap, bárine tushymdy jaýap qaıtardy. Sondaı-aq basqa óńirlerden onlaın rejimde baılanysqa shyqqandardyń aıtqanyna qulaq túrdi.
Is-shara barysynda mınıstr zorlyq jasaǵandardy jazalaýǵa qatysty pikir bildirdi.
– Adam zorlaý qylmysynyń jazasy zańnamalyq jaǵynan jan-jaqty bekitilgen. Arnaıy baptyń birinshi, ekinshi, úshinshi bólimderi bar. Toptyq zorlaý jeke qarastyrylǵan. Barlyǵynda jaza – qatań. Bir bapta jeńil, birinde qatań dep aıtý ekitalaı. Ár jaǵdaıǵa jeke-jeke qaraý kerek. Adam zorlaý – aýyr qylmys. Munda azamat retinde de, áıel retinde de zábirlenýshiniń jeke erkindigine qol suǵylyp, ar-namysy taptalady. Sondyqtan aýyr qylmystyń jazasy da aýyr bolýy kerek, – dedi Erlan Turǵymbaev.
Mınıstr BAQ ókilderine Qylmystyq-prosestik kodekske ózgertýler men tolyqtyrýlar engizilýi múmkin ekenin aıtty. Qazir Bas prokýratýra Ishki ister mınıstrligimen birigip, osy máseleni qarastyryp jatyr eken. Onyń ishinde túzetý mekemelerine qatysty ózgerister bar. Qoldanystaǵy Qylmystyq-atqarý kodeksine 60-tan asa ózgeris engizý usynylypty. Endi Bas prokýratýraǵa joldanǵan usynystar Parlamentte talqylanbaq.
Sonymen qatar Erlan Turǵymbaev gaz ballony jarylýy saldarynan ata-anasynan aıyrylǵan Ekibastuz turǵynynyń aryzynan keıin Pavlodardyń polısııa qyzmetkerlerin qatty synap, máseleni qaıta qaraýdy tapsyrdy. Jalpy bul oblysta turǵyndardyń jıi shaǵymdanatynyn aıtqan mınıstr saqshylardy jazalaıtynyn, tipti jumystan da shyǵaratynyn jetkizdi.
