QR Ulttyq ekonomıka mınıstrliginiń derekteri boıynsha, qazirgi tańda elimizde 18,4 mln shamasynda adam bar, olardyń ishinde qala turǵyndary — 10,7 mln adam, aýyl turǵyndary — 7,7 mln adam. Aýyl halqynyń sany 42% quraıdy.
E. Alpysovtyń aıtýynsha, jańa óńirlik saıasatqa sáıkes О́ńirlerdi damytýdyń jańa memlekettik baǵdarlamasy ázirlendi, ol basqarylatyn kenttený arqyly halyqtyń turmys sapasyn jaqsartýǵa jáne óńirlerdiń ekonomıkalyq básekege qabilettigin arttyrýǵa baǵyttalǵan.
«Kenttený máselelerimen qatar, memlekettik baǵdarlamada jańa sharalar qarastyrylǵan. Bul — «Aýyl – El besigi» jobasyn iske asyrý, iri qalalardyń tóńirekterin damytý jobalaryn iske asyrý jáne О́ńirlik standarttar júıesin engizý», dedi E. Alpysov.
Osy maqsatqa qol jetkizý aýyldyq eldi mekenderdiń áleýmettik jáne ınjenerlik ınfraqurylymyn damytýǵa qarajat bólý, aýyl turǵyndarynyń qabyldanǵan óńirlik standarttarǵa sáıkes áleýmettik ıgilikter men qyzmetterge qoljetimdiligin qamtamasyz etý arqyly júzege asyrylady.
E. Alpysovtyń aıtýynsha, aldaǵy úsh jylda «Aýyl – El Besigi» jobasynyń is-sharalaryn iske asyrý úshin respýblıkalyq bıýdjetten 90 mlrd teńge, onyń ishinde 2019 jyly 30 mlrd teńge bólindi. Sonymen birge, jobany júzege asyrýǵa jergilikti bıýdjetten shamamen 4,7 mlrd teńge bólindi.
«Bıyl 700 myńǵa jýyq adam turatyn 53 aýyldyq eldi meken tańdaldy. 2019 jyly jumystar úlken aýyldyq eldi mekenderde – halqy kóp aýdan ortalyqtarynda júrgiziledi, onda jınaqtalyp qalǵan ótkir ınfraqurylymdyq problemalardy tez arada sheshý qajet», — dedi ol.
Jobany iske asyrý qorytyndysy boıynsha 2019 jyly 4673 jańa jumys orny qurylady, 73 mektep pen balabaqsha, 14 emhana, 47 mádenıet úıi men sport nysandary jóndeledi, 13 dene shynyqtyrý-saýyqtyrý kesheni, 13 abattandyrý nysanynyń qurylysy bastalady.
Sondaı-aq, 516 km jol, 35 km sýmen jabdyqtaý jelisi, 229 km elektrmen jabdyqtaý (jaryqtandyrý), 136 km gazben jabdyqtaý, 20 km jáne 6 jylýmen qamtamasyz etý nysandary jóndelip, salynady.
«Kelesi jyldan bastap klasterlik tásildi engizýdi kózdeımiz, onda aýyldyq eldi mekender jekelegen toptar – klasterler (tirek aýyldan 10-15 km radıýsta) aıasynda qarastyrylatyn bolady», dedi E. Alpysov.
Máselen, Shortandy aýyly jaqyn ornalasqan aýyldar úshin tirek aýyl bolyp sanalady. Atalǵan aýyldardyń halqy úshin barlyq áleýmettik ıgilikter men qyzmetter tirek aýylda usynylady. Kólik baılanysy ornaıdy.
«2025 jylǵa deıin 6,6 mln aýyl turǵynyn jaqsartylǵan ınfraqurylymmen jáne áleýmettik ıgiliktermen qamtý josparlanǵan», — dedi vıse-mınıstr.
Aldyn ala derekter boıynsha, 3 477 aýyldyq eldi mekendi biriktiretin 1 150 aýyldyq klaster bar, onyń ishinde 1 150 tirek aýyl, 2 327 spýtnıktik jáne shekara mańy aýyldary.
