– Bul úshin oblystyq bıýdjetten 54 mln teńge bólinip, ortalyq úshin qolaıly ǵımarat jóndeýden ótkizildi jáne jıhazben, kompıýtermen jabdyqtaldy. Arnaıy kólik satyp alyndy. Bir balanyń ómiri saqtalsa, bir otbasynyń ajyraspaı tútini túzý ushsa, eńbektiń qaıtarymy bolǵany, – deıdi oblys ákiminiń orynbasary Marat Júndibaev. Rasynda, jarty jylda ortalyq jumysynyń nátıjesi de kórinipti.
– Eger byltyr oblysta balalar men jasóspirimder arasynda ózine qol jumsaýdyń 9 oqıǵasy tirkelse, bıyl 3 sýısıd oryn alǵan. Jumysty bastaǵaly senim telefonyna qońyraý shalǵandar men psıhologtardyń qabyldaýyna kelgender sany 400-ge jýyqtaıdy. Basym kópshiligin psıhologtar jeke qabyldady, keńester berdi. Senim telefony táýlik boıy jumys isteıdi. Keıde ata-analardan nemese balalardan qońyraý túsken kezde, oqıǵa ornyna jedeldetilgen top jiberýge týra keledi. Aýdandarǵa shyǵyp, semınarlar ótkizdik, aýyl mektepterindegi psıhologtardy, tipti muǵalimderdi de oqytamyz, – deıdi Psıhologııalyq qoldaý jáne qosymsha oqý óńirlik ortalyǵynyń dırektory Elena Petrenko.
Ortalyqtyń ishinde kúızelip kelgenderdiń júıkesin jumsartyp, olardy áýeli seıiltip alatyn psıhologııalyq erekshe kúı kútip alady. Tyrnaǵyna deıin kúıip, ómirden kúder úzip kelgen adam aldymen janǵa da, tánge de jaıly jumsaq jıhazǵa otyrady, oǵan ystyq shaı, tiske basar táttiler usynylady, jandy jadyratar áserli mýzyka qoıylady. Taǵdyrdyń tálkegine túsken jas osylardan keıin dereý esin jınaǵandaı, tynyshtalatyn kórinedi. Sodan keıin mamandar onymen jumysty bastaıdy. Ortalyqqa kelýshilerdi dárigerler emdemeıdi, olarǵa psıholog-pedagogtar keńes beredi. Eger psıhıatrdyń kómegi kerek bolǵan jaǵdaıda shaqyrtylady. Ortalyqtyń psıhıatr mamandarmen kelisimi bar, olar der ýaqytynda jetedi.
– Bul – bizdiń ábden talqylap, jeti ret piship, bir ret kesken izdenisimizdiń nátıjesi. Ozyq elderdiń tájirıbelerine qarasaq, olar psıhologııalyq kómekke jıi júginedi. Bul – qoǵam densaýlyǵynyń eń mańyzdy bóligi. Sondyqtan osy tájirıbeni ózimizde bastaýdy jón kórdik. Ortalyqtyń alty aıǵy jumysy baǵytymyzdyń durystyǵyn dáleldedi, – deıdi oblystyq bilim basqarmasynyń basshysy Vasılıı Symbalıýk. Ortalyqtaǵy bilikti psıhologtardyń biri Anastasııa Baranova kómekke júginetinderdiń basym kópshiligi til tabysa almaǵan bala men ata-analar ekenin aıtty.
– Mundaı jaǵdaılar bizdiń jumysymyzdaǵy negizgi sıpatqa ıe. Keıde ata-ana balasymen keledi, keıde bala ózi kelip, ózin túsinbeıtin ata-anasyna shaǵym jasaıdy. Búgin otbasylardaǵy naǵyz ózekti jaı da osy ata-ana men balanyń arasyndaǵy kelispeýshilik. Sosyn ómirde túrli jaǵdaı bolady, balalardy qorlaýdyń, jasóspirim qyzdardyń aıaǵy aýyr bolyp qalmaý úshin aldyn alý jumystaryn júrgizemiz, jasóspirimder men balalardy kúızelisten alyp shyǵý, sýısıdtiń aldyn alý – basty maqsatymyz. Tótenshe jáne ekstremaldy jaǵdaılarda psıhologııalyq kómek beremiz, – deıdi Anastasııa Andreevna. Jaqyn kúnderi ǵana oǵan jasóspirim qyz bala keldi. Anasy erteleý qaıtyp ketken, ákesi de búginde aýyr halde jatyr. Úlken apaıymen aradaǵy túsinispeýshilikten júdep júrgende, óziniń jaqsy kóretin jigiti de oǵan teris qarap ketken. Qyz bala kúızelisten ózine qol jumsaýǵa sál-aq qalǵan. Ortalyq mamandary psıhologııalyq ádisterdi qoldanǵan áńgimelesýlerden keıin ómirdiń tyǵyryqqa tiregen aýyrlyǵynan kúızelgen qyz balanyń jigeri oıanǵan, janarynda jarqyl paıda bolǵan. Mundaı jastardy tirkep, olarmen jıi habarlasyp, baqylap otyrady eken.
Ortalyqtyń ashylýyna Nur Otan partııasy janyndaǵy quqyq qorǵaý keńesi tóraǵasynyń orynbasary Dınara Zákıeva qatysty.
– Osyndaı problemalardy sheshken jaǵdaıda ǵana ár otbasy qaıǵy-muńsyz ómir súredi. Psıhologııalyq kómek berý ortalyǵy «Baqytty otbasy» baǵdarlamasy aıasyndaǵy ómirge joldama alǵan jańalyǵy mol is ekenin kórip turmyz. Ata-ananyń, balanyń túsinistigi ornaǵan otbasy naǵyz baqytty otbasy bolady, onda balalar da jaqsy tárbıe alady, – degen ol ortalyq mamandarynyń jumysyna jaqsy nátıje tiledi.
Bul ortalyqtyń ázirge elimizde balamasy joq. Onyń nátıjesi balanyń baqytty bolashaǵyna arasha bolaryna psıholog mamandar da senimdi.
QOSTANAI
