Eki kúnge sozylǵan semınar bastalar aldynda Mańǵystaý oblystyq soty tóraǵasynyń mindetin atqarýshy Erjan Qarabaev pen azamattyq ister jónindegi sot alqasynyń tóraǵasy Nursapa Prımashev quttyqtaý sóz sóıledi. Olar sýdıalardyń sot prosesteriniń ashyqtyǵy men jarııalylyǵyn qamtamasyz etip otyrǵany týraly aıta kelip, óńir sottarynda «Sot tóreliginiń jeti túıininiń» júzege asyrylyp jatqany týraly áńgimelep berdi.
Uıymdastyrýshylar qatysýshylarǵa jýrnalısterdiń quqyqtary men mindetteriniń qandaı bolatyny, suhbatty daıyndaý tehnologııasy, rezonansty jarııalanymdarǵa den qoıý jáne mýltımedııalyq kontent jasaý týraly áńgimelep berýdi josparlady. Talqylaýlar taqyrybynyń ózektiligi, muqııat josparlanyp sóılengen sózder men ınteraktıvtik sabaqtar serpini trenıngti onyń qatysýshylary úshin tartymdy da paıdaly ete bildi. Bul týraly olar is-sharanyń barysynda jáne áleýmettik jelilerdegi ózderiniń akkaýnttarynda aıtyp ótti.
Jumysty oblsottyń otstavkadaǵy sýdıasy Inessa Kýanova ashty. Ol sot qurylysy men sot isin júrgizý: negizgi uǵymdar, sot satylary, sot aktileri, sondaı-aq zań tehnıkasynyń negizderi týraly aıtyp berdi. Spıker óziniń sot praktıkasynda kezikken ártúrli ahýaldarǵa baılanysty pikirlerimen bólisti.
JS-tyń sýdıasy Elena Maksıýta áleýmettik jelilerdegi jumys: beıin men kontentti jasaý, qaýipsizdik máseleleri týraly aqparat berdi. Túsindirmeler berý prınsıpteri týraly tilge tıek ete kelip, spıker áleýmettik jelilerdegi syn materıaldarǵa den qoıýdyń ártúrli keısterin usyndy.
JS-tyń baspasóz hatshysy Aıdos Sadýaqasov pen «Qazaqstannyń Sot jýrnalısteri lıgasy» OF dırektory Máýletbaı Serikjan BAQ ókilderine sot prosesterin qalaı jarııalaýǵa: jýrnalısterge sot zalynda neni isteýge jáne neni istemeýge bolatyny týraly túsindirip berdi.
Ekinshi kúni jýrnalısterdiń sot otyrysy zaldaryna qoljetimdilik máseleleri, sot prosesi barysyndaǵy olardyń ózderin ustaý qaǵıdalary, sot qyzmetin kórsetýdegi ádep pen kásibı normalar, sottarda jýrnalıster quqyqtarynyń buzylýy talqylandy.
Semınardyń qatysýshylary ınteraktıvti pikir almasýlarǵa jáne ártúrli keıster boıynsha róldik oıyndarǵa qatysty. Trenıngtiń árbir qatysýshysy BAQ pen sottardyń ózara baılanysy kezinde jıi týyndaıtyn oqıǵalarǵa jáne kezikken tyǵyryqty jaǵdaıdan jol taýyp shyǵý mindetine tap bolǵandaı áser aldy. Barlyq oqıǵalar ártúrli, alaıda olardy bir birine uqsas táýekelder men qobaljýlar biriktirip turǵandaı edi. Mysaly, BAQ ádeıi nemese kezdeısoq aqparattyń óńin aınaldyryp jibere alady, jýrnalıst sensasııany «shıryqtyryp» jiberedi, BAQ-tyń qatysýy taraptardyń tatýlasýyna jáne tatýlasý kelisimin jasasýǵa kedergi keltirýi, sondaı-aq básekelester úshin qyzyǵýshylyq týdyratyn kommersııalyq qupııany ashyp jiberýi múmkin, bul tutynýshylar suranymyn kúrt tómendetip, shyǵyndarǵa ákep soǵady.
Jumysty qorytyndylaı kelip, A.Sadýaqasov quqyqtúsindirý jumystaryn júrgizýdiń ózektiligin atap kórsetti. Onyń pikiri boıynsha, sot qyzmetiniń máni men zańnama negizderin durys túsinbeý kóbinese qoǵamdaǵy daý-janjalshyldyqty týyndatady. Ol semınarǵa qatysýshylardy osy jumysqa qatysýǵa shaqyrdy. «Biz ortaq isti jasap jatyrmyz – adamdarǵa zań normalaryn jerine jetkize túsindiremiz, sýdıanyń jumysy jáne sot sheshimderine shaǵym berý, narazylyq keltirý múmkindikteri týraly obektıvti túrde aıtýdan jalyqpaımyz, dedi ol.
Jumys qorytyndylary boıynsha qatysýshylar semınar-trenıng spıkerleriniń usynymdaryn talqyǵa túsirdi. Barlyq qatysýshylarǵa sertıfıkattar tapsyryldy.
Mańǵystaý oblysy
