Festıvaldyń ashylý sátinde QR Tuńǵysh Prezıdenti- Elbasy Qorynyń atqarýshy dırektory Áset Isekeshov, Almaty ákimi Baqytjan Saǵyntaev, Aqparat jáne qoǵamdyq damý vıse-mınıstri Marat Ázilhanov quttyqtaý sózderin aıtty.
«Búgingi kúni adamı kapıtal – ult jetistiginiń basty faktory. Festıvaldiń shabyt beretin, naqtyly baǵytty aıqyndaıtyn alǵashqy qarlyǵash jáne sizderdiń árqaısylaryńyzdyń beıbitshilik pen kelisimniń uıtqysy ekendikterińizge senimdimin. Bizdiń festıval – bul tek alǵashqy qadam ǵana, al bolashaqta bizdi uzaq jáne barynsha nátıjeli jol kútip tur. Aq jol, dostarym meniń!», – dedi óziniń quttyqtaý sózin oqyǵan QR Tuńǵysh Prezıdenti - Elbasy Qorynyń atqarýshy dırektory Áset Isekeshov.
Qala ákimi Baqytjan Saǵyntaev keler jyly Almatyda Ortalyq Azııanyń eriktileri men eriktiler uıymdarynyń Jastar forýmyn ótkizýdi usyndy. Qala basshysy memlekettiń damýyndaǵy jastardyń erekshe róli jáne el Prezıdenti Q. Toqaevtyń aldaǵy 2020 jyldy Eriktiler jyly dep jarııalaýy jastar arasyndaǵy yntymaqtastyqty nyǵaıtýǵa oń yqpal etetinin atap ótti.
«Jastardyń tikeleı aralasýy strategııalyq seriktestikti, dostyq pen tatý kórshi bolýdy nyǵaıtýdyń basty sharty bolyp tabylady. Sondyqtan Qazaqstannyń Tuńǵysh Prezıdentiniń qoryna, BBU-nyń ókildigine, ózge de yntaly uıymdar men qonaqtarǵa - jalpy barlyqtaryńyzǵa 2020 jyly Almatyda Orta Azııanyń eriktileri men eriktiler uıymdarynyń Jastar forýmyn ótkizý múmkindigin qarastyrýdy usynamyn», - dedi B. Saǵyntaev.
QR Tuńǵysh Prezıdenti – Elbasynyń Qory men Almaty ákimdigi ótkizip otyrǵan bul festıval Qazaqstandaǵy Jastar jylyna arnalǵan. Alqaly sharany ótkizýdegi Qordyń seriktesteri – BUU, EQYU jáne Konrad Adenaýerdiń qory.
Festıval jastar jetekshileriniń áleýetin arttyrýǵa, Orta Azııa jastary úshin turaqty dıalog alańyn, óńirlik ıntegrasııany, seriktestikti qurýǵa, el óńirleri jastarynyń resýrstaryn ortaq iske keńinen jumyldyrýǵa, jastar saıasatyndaǵy ozyq tájirıbelerdi almasýǵa baǵyttalǵan.
Festıval aıasynda oǵan qatysýshylar óńirlik mańyzdy máseleler men problemalardy keńinen talqylaıdy. Sessııa jumysynda IT-tehnologııaǵa, kıberqaýipsizdikke, mıgrasııa problemalaryna, zııatkerlik kapıtaldy saqtaýǵa, salaýatty ómir saltyn qalyptastyrýǵa, qoljetimdi bilimge, polıetnıkalyq qoǵam – beıbitshilik pen kelisim modeli taqyryptary qozǵalatyn bolady.
ALMATY
