Úkimet basshysy aldymen «Nur Aqtóbe» turǵyn úı keshenindegi qurylys jumystarymen tanysty. Munda 27 kópqabatty úı salynyp jatyr. Jospar boıynsha bıyl oblysta 1 mıllıon sharshy metr turǵyn úı paıdalanýǵa beriledi.
«Jyl sońyna deıin 1400-den astam páter »Nurly jer« baǵdarlamasymen beriledi. Al «Baqytty otbasy» baǵdarlamasy aıasynda qaladaǵy kópbalaly otbasyǵa 40 sertıfıkat úlestirildi. Bul - alǵashqy jarna bolady«, - dedi qala ákiminiń orynbasary Ushqyn Myńbaev.
Qala ákimi Mavr Abdýllınniń aıtýynsha, bıyl bes myń páter qoldanysqa beriledi. Onyń ishinde 30 kópqabatty úı memlekettik, 31-i kommersııalyq. »Eń qıyny - jer kezegi. Qazir qala boıynsha 140 myń adam jer alýǵa ótinish bergen. Barlyǵy 393 baý-baqsha ujymy bar. Onyń 40-na jer telimi statýsy berilip jatyr. Endi ınfraqurylymyn jańartý qajet. Sý, gaz kerek. Olarǵa 6,2 mıllıard teńge qarjy suraımyz. 18 myń jer telimine 8 jobalyq-smetalyq qujat jasaldy.
Memleket basshysynyń qoldaýymen bastalǵan «Baqytty otbasy» baǵdarlamasy boıynsha 1090 ótinish tústi. Onyń 471-i «Turǵyn úı qurylys jınaq banki» arqyly tólem qabiletin rastady. Buǵan 2 mıllıard teńge aqsha bólinip, ıgerildi. Taǵy 555 otbasyna qarjy suraldy. Ony qyrkúıekte ıgerip, taǵy aqsha suraǵymyz keledi«, - dedi Mavr Abdýllın. Aıta keteıik, qala boıynsha kezekte 24 myń adam páter kezeginde tur. Úkimet basshysy baspanamen qamtamasyz etý máselelerinen habardar bolǵan soń, qurylys jumystarymen tanysty.
