Otandyq jeńil ónerkásipti qoldaý jáne salany damytýdy maqsat etken forýmǵa 80-ge jýyq otandyq kompanııa qatyspaq. Kórmege kıim, aıaq kıim jáne úıge arnalǵan toqyma buıymdary, áshekeıler, qolóner sheberleriniń jumystary qoıylady. Sonymen qatar kórmege joǵary deńgeıdegi treıder kompanııalar da shaqyrylǵan. Baspasóz konferensııasy barysynda spıkerler tamyzdyń aıaǵyna josparlanǵan aıtýly sharaǵa qatysý sharttary týraly habarlap, kórmeniń arnaıy qonaqtary – Fashion Academy a Paris ókilderi, Polimoda, Eurasian Fashion Week kıim dızaıny ınstıtýtynyń mamandary týraly aqparat berdi. Forým men kórme qatysýshylaryna tegin semınarlar, eýropalyq jáne otandyq jetekshi mamandardyń sheberlik sabaqtaryn ótkizý josparlanǵan. Mysaly, «Bıznes retindegi qolóner» dárisi sheńberinde ıtalııalyq óndiris júıesi týraly málimet berilip, Apennın túbeginde óndirilgen ónimderdiń ańyzǵa aınalǵan sapasy, óndiris júıesiniń qurylymy, erekshelikteri túsindiriledi.
Forýmnyń ekinshi kúni toqyma jáne mata tańdaý týraly dáriste Chanel, Dior, Kenzo, Celine sán úılerine arnap jibek jáne jakkard matalaryn óndiretin fransýz fabrıkasynyń ókili, Fashion Academy a Paris kompanııasynyń mamany dáris oqıdy. Onda aldaǵy maýsymdardyń jańa, sándi matalardyń úlgileri tanystyrylyp, onyń quramy jáne óndirý prosesi talqylanady, matalardy jikteý jáne órim tıpteri týraly aqparat beriledi.
