Tanymal blogerler Qazaqstandy tanystyrdy

Jastar jyly aıasynda «A kind heart» qoǵamdyq birlestigi uıymdastyrǵan aýqymdy is-sha­raǵa Azamattyq bastamalardy qol­­daý ortalyǵy men Aqparat já­ne qoǵamdyq damý mınıstrligi qol­daý kórsetti.

Úsh kezeńnen turatyn atalǵan jobanyń alǵashqy kezeńinde «Men Qazaqstannanmyn» atty vı­deo­blog konkýrsy ótti. Buǵan qatysýshylarǵa týǵan qalalary men aýyldary týraly vıdeoblog daıyndap, ol mekendi týrısterge tartymdy etip kórsetý úshin belgili oryndary men kórikti jerlerin erekshe tanystyrýy shart boldy.

Ekinshi kezeńde Qazaqstannyń barlyq aımaqtaryna halyq­aralyq blog-týr uıymdas­ty­­ryldy. Joba aıasynda Ulybrıtanııa, Aýstralııa, AQSh, Italııa, Reseı, Taıland, Úndistan, Grekııa, Kanada, Koreıa Respýblıkasy, Túrkııa jáne Fı­lıppın elderiniń tanymal blo­gerleri bizdiń elge taban tiredi. Olar qazaqstandyq blogerlermen birge óńirlerge 5 kúndik saıahat jasady. Osydan keıin qatysýshylar Qazaqstan týraly beıne sholý ázirlep, ony áleýmettik jelilerdegi óz arnalarynda jarııalady.

Al sońǵy kezeńde aıtýly jo­banyń qorytyndysy retinde elordada eki kúnge jalǵasqan forým saltanat qurdy. Bul is-sharanyń ashylý saltanatynda Aqparat já­­ne qoǵamdyq damý mınıstri Dáý­ren Abaev jobanyń maqsaty talantty jastardyń qabiletin kórsetý, medıa salasyndaǵy ynty­maqtastyqty arttyrý, tájirıbe almasý jáne týrızmdi damytyp, Qazaqstannyń sheteldegi bet-bede­rin qalyptastyrý ekenin aıtty.

– Bıyl Qazaqstanda Elbasy­nyń bastamasymen Jastar jyly dep jarııalanǵan bolatyn. Osy jyldyń aıasynda jastardy qol­daýǵa arnalǵan san alýan is-sha­ra júzege asyrylýda. Búgingi bas­qosý da osymen sabaqtasyp otyr. Saryarqanyń samaly janǵa jylý beretin, Jetisýdyń taý­lary asqaq rýh syılaıtyn, shyǵysy shyraıly, batysy aıbyndy, soltústigi kórikti, ońtústigi órikti elge tabany tıgen ər adam qanattanyp turady. Qus bolyp ushqysy keledi, júırik atqa minip, shapqysy keledi. Ondaı áserge sizder de bólendińizder dep oılaımyn. Kóshpendiler órke­nıetiniń temirqazyǵy sanalatyn Qazaq eliniń qushaǵy qonaqtarǵa ərdaıym ashyq. Ərbir mekeni ǵana emes, ərbir tasynyń ózi tereń tarıhtan syr shertetin tabıǵaty tańǵajaıyp, Uly dalanyń tósi sizderdi sulýlyǵymen baýrap aldy dep men senemin, – dedi Dáýren Abaev.

Forým barysynda jan-jaqty maǵlumat beretin «Trevel blogıng», «YouTube-bloger profılin damytý», «Bıznes-blogıng», «In­sta­gram-bloger profılin damytý», «Qazaq Instagram» at­ty sheberlik sabaqtary ótip, qyzy­ǵýshylyq tanytyp kelgen jastar blogıngtiń biraz qyr-syryna qa­nyqty. Ásirese tisqaqqan blogerler Instagram men YouTube-ta sapaly kontent jasaýdyń, óz bren­din qalyptastyrýdyń jolyn túsindirdi.

Qazaqstannyń kórikti jer­lerin aralap shyqqan tanymal blogerler forýmda dıalog ala­ńyn quryp, alǵan áserlerimen bólisti. Solardyń biri Forbes-tyń nusqasy boıynsha álemdegi eń tanymal úzdik úshtikke kiretin saıahatshy-bloger Mýrad Osmann osyndaı tamasha jo­banyń ortasynan tabylǵanyna, jańa dostarmen tanysqanyna qýanyshty ekenin jáne bul elge birneshe ret kelse de, tańdanýdan tanbaıtynyn jetkizdi.

Sondaı-aq AQSh-tan kelgen saıa­­hatshy, rejısser, áleýmettik je­lilerde FunForLouis atymen tanymal, YouTube-taǵy arnasynda álem elderine jasaǵan saparlaryn turaqty túrde jarııalap turatyn Lýı Djon Koýll da Qazaqstanǵa qurmeti erekshe ekenin, bul saparda tanymy keńeıgenin aıtyp, oń pikirin bildirdi.

Forýmnyń ekinshi kúninde «Men Qazaqstannanmyn» atty vıdeoblogerler baıqaýynyń jeńimpazdaryn marapattaý rásimi ótti. Konkýrsqa qatysýǵa 1000-ǵa jýyq ótinim túsip, 200-den asa jumys qabyldandy. Fınalǵa 15 vıdeobloger ótti. Qaty­sý­shylardyń jobalaryn Álisher Elikbaev, Birjan Áshim, Lýı Koýll jáne Mýrad Osmann sııaqty eli­mizdiń jáne shetelderdiń ataqty blogerleri qarap, jeńimpazdardy anyqtady.

Sonymen Alakóldi aıryqsha tanystyrǵan Dıdar Muratov «myń­nan tulpar» shyǵyp, 1 mıllıon teńgeni enshiledi. Al 500 myń teńgelik ekinshi oryndy Aq Baýyr petroglıfteri týraly vıdeosymen Dmıtrıı Moskalenko jeńip aldy. Úzdik úshtikke ilingen Aldııar Baıraqymov Kók Jaılaýdy erekshelep kórsetip, 200 myń teńge ıelendi. Sondaı-aq «Avıata» kom­panııasynyń arnaıy nomınasııasy Almaty týraly blogymen Jasulan Baqytjanovqa jáne «Sevens» aýyzsýynyń syılyǵy Assy jaılaýyn áspettegen Aıda Tastemirovaǵa tapsyryldy.