M. Beketaev jeltoqsan aıynda qabyldanatyn Zań jobalary jumysynyń jospary bar ekenin atap ótti. Osy Josparǵa sáıkes birqatar zań jobasy Qazaqstan Respýblıkasy Parlamenti Májilisine jiberiledi dep kútilýde.
2019 jyldyń qańtar-qyrkúıek aılarynda 19 zań jobasyn QR Parlamentine engizý josparlanǵan bolatyn. Búginde 9-y engizildi. Bir zań jobasyn engizbeý týraly sheshim qabyldandy.
«Sebebi ony retteý aıasy jetkilikti túrde aýqymdy emes. Bul máseleni (asyl tuqymdy mal sharýashylyǵy máselesi) neǵurlym naqty zerdeleý kezinde Aýyl sharýashylyǵy mınıstrligi bul zań jobasyn engizýden bas tartýǵa sheshim qabyldady jáne ony belgili bir merzimge keıinge qaldyrdy», — dep túsindirdi mınıstr.
Qalǵan 9 zań jobasynyń úsheýi tamyz aıynyń sońyna deıin Parlamentke joldanady. Altaýy qyrkúıek aıynda jiberiledi.
Sonymen birge, M. Beketaev jańa saıası maýsymda jańa zań jobalaryn qabyldaý qajettiligi týyndaıtynyn aıtty.
«Memleket basshysynyń ár Joldaýynan keıin ony iske asyrý jónindegi is-sharalar jospary qurylatynyn bilesizder. Sessııanyń ashylýynda Memleket basshysynyń Joldaýy jarııalanady dep josparlanǵan. Zań jobalarynyń qosymsha tizimi de jasalady dep boljaýǵa bolady. Bul tizimdegi merzimder qatalyraq ári qysqaraq bolýy múmkin», — dedi M. Beketaev.
Sonymen qatar Ádilet mınıstri zań normalaryn shyǵarý qyzmetin jetildirý máseleleri boıynsha zańnamalyq túzetýler paketiniń qabyldanýymen jańa zańdardy qabyldaý merzimderin buzǵany úshin jaýapkershilik kúsheıtiletinin atap ótti.
«Úkimet reglamentine biz usynyp jatqan ózgerister jaýapkershilikti kúsheıtýdi kózdeıdi. Eger qazirgi ýaqytta bul vıse-mınıstrler bolsa, bizdiń usynysymyz boıynsha mınıstrge úlken jaýapkershilik júktelýi kerek. Eger qazir merzimdi bir ret jazasyz qaldyrýǵa bolatyn bolsa, ekinshi kóshirý vıse-mınıstrge shara qabyldaýdy qamtysa, bıyl bul máseleni kúsheıtý josparlanýda. Bul zań jobasy Parlamentke usynylady, qandaı da bir ýaqytta qabyldanady, biraq biz memlekettik organdar bul tetikterdi qandaı da bir deńgeıde qazir, zańnyń qabyldanýyn kútpeı-aq, qoldanǵanyn qalaımyz», — dedi mınıstr.
Nekeni jedel tirkeý týraly jýrnalısterdiń suraǵyna jaýap bergen M. Beketaev nekege turýǵa ótinish bergennen keıin bir aı kútý eń ońtaılysy ekenin atap ótti.
«Jeke pikirimmen bóliser bolsam, áreket etip turǵan zańnama ońtaıly retteýdi qarastyrady jáne ol jetkiliksiz bolýy múmkin, óıtkeni ajyrasý faktileri óte kóp. Qazir “Keıinirek kelińiz” dep aıtý da durys shyǵar, jastar emosıonaldy kúıden ótip, biraz ýaqyttan keıin, bárin durys oılanyp, ata-analarymen aqyldasyp baryp, qarym-qatynastaryn tirkegeni durys shyǵar», — dep basa aıtty Marat Beketaev.
Qorytyndylaı kele, Ádilet mınıstri zańdardyń jıi ózgerýi qazirgi qoǵam úshin qalypty úrdis ekenin atap ótti.
«Zańdardyń qabyldanyp, olarǵa 10-20 jyl ishinde eshqandaı ózgertýler engizilmeıtin ýaqyttardy eske alý, bul - durys túsinik emes. Sebebi zańdardyń jıi ózgerý jaǵdaıy Qazaqstanǵa ǵana tán emes. Bul qazir búkil álemde ǵylymnyń, tehnologııalardyń jedel damýyna baılanysty bolyp otyrǵan jaǵdaı», — dedi M. Beketaev.
Onyń aıtýynsha, múldem jańa qatynastar týyndaýda. Buǵan deıin ınternet bolǵan joq, tehnologııalar sonshalyqty jıi ózgermeıtin. Mysaly, kıbervalıýta paıda boldy. Bul — jańa qoǵamdyq qubylystar, retteýdi qajet etetin quqyqtyq qatynastar jáne bul zańdarǵa ózgerister engizýdi talap etedi.
«Eger biz zańdardaǵy ózgeristerge ilesip otyrmasaq, biz ınvestorlardy tartý boıynsha, bıznesti ishki retteýde basqa ıýrısdıksııalarmen básekege túse almaımyz, onda bizdiń kompanııalarymyz jańa jaǵdaılarǵa tez beıimdeletin elder sııaqty básekege qabiletti bolmaıdy. Sondyqtan ómirdegi ózgeristerge ilesip, zańnamany beıimdeý óte mańyzdy», — dedi mınıstr.
