Aıta keteıik, «Úzdik maman» baıqaýy 2019 jyldyń sáýir aıynda bastalyp, Qazaqstan jastaryn qoldaýǵa jáne damytýǵa baǵyttalǵan. Bul baıqaýdyń maqsaty – Qordyń jumysyn jaqsartatyn eń talantty, daryndy jastardy iriktep alý. Baıqaý jeńimpazdarynyń barlyǵyna dıplom men aqshalaı sertıfıkat tabystaǵan Ahmetjan Esimov olardyń aldynda zor múmkindikter ashylyp turǵanyn eske saldy. Sondaı-aq Esimov Qordyń jańa kadrlyq saıasatynyń nátıjelerimen bólisti.
«Osy jumystardyń barlyǵy bolashaqta Qorǵa Ortalyq Azııadaǵy nómiri birinshi jumys berýshi bolýǵa jáne TMD keńistigindegi top 30-ǵa kirýge múmkindik beredi. Elbasy atap ótkendeı, Qordyń basty aktıvi men áleýeti – adam resýrstaryn damytý jáne kadrlarmen jumys. Sizder álemniń tez ózgerip jatqanyn kórip otyrsyzdar, keshe tek qııal ǵana bolyp kóringen nárseler búgin bizdiń ómirimizdiń kúndelikti qajettiligi. Sizderdiń árqaısyńyz jańa daǵdylar alyp, álemde bolyp jatqan jaǵdaıdan qalys qalmaýlaryńyz kerek», dep atap ótti jeńimpazdardy quttyqtaǵan Ahmetjan Esimov.
Esimovtiń aıtýynsha, Qordyń jańa kadrlyq saıasaty 2018 jyly bastalǵan jáne kadrlyq saıasat bilikti jumysshylardy izdeý jáne irikteý prosesiniń tıimdiligin arttyrýǵa baǵyttalǵan. Osylaısha qyzmetkerlerdi konkýrstyq irikteýdiń biryńǵaı rásimi engizildi jáne Qor kompanııalar tobynyń Samruk Qyzmet atty bos oryndar saıtynda iske qosyldy.
Aıta keteıik, osy nátıjelerdiń arqasynda 2018 jyly 1 bos orynǵa 300 adam ótinish bergen. 2017 jylmen salystyrǵanda, bul kórsetkish 2 esege ulǵaıdy. Jáne de jumys turaqsyzdyǵy 1,7 ese azaıyp, Qor kompanııalary qyzmetkerleriniń ishinen joǵary laýazymdarǵa taǵaıyndaý 3,5 esege ósti. Qor ishindegi «Jas Samuryq» baǵdarlamasy iske qosylǵan sátten bastap Qor 100-den astam jobany júzege asyrdy.
