Jaıyq ózeniniń Batys Qazaqstan oblysyndaǵy uzyndyǵy 500 shaqyrym bolady. О́zen óńirdiń Bórli, Báıterek, Terekti jáne Aqjaıyq aýdandarynyń jerimen ótedi. Oral qalasynyń tusynda ǵana qos kópir bolmasa, oblys aýmaǵynda basqa jerde turaqty ótkel joq edi. О́zenniń eki jaǵyndaǵy el ár jerdegi sanaýly paromǵa muqtaj bolatyn. Ásirese aýyldyq okrýgteri ózenniń eki betine ornalasqan Aqjaıyq aýdany turǵyndaryna qıyn edi. Aýdan ortalyǵy, Oral-Atyraý tas joly Jaıyqtyń oń jaq – Samar betinde bolǵandyqtan, sol jaǵalaý – Buqar bet halqy jol azabyn, ótkel qıyndyǵyn únemi kóredi. Aqjaıyq aýdany halqynyń 25 paıyzy, ıaǵnı 10 myńǵa jýyq turǵyn Jaıyqtyń sol jaǵalaýyndaǵy 19 eldimekeninde turady.
Mine, búgin Chapaev aýyly tusynda salynǵan qalqyma kópir ótkelge zárý halyqtyń talaı jyldan beri armanyna qol jetkizdi. Joǵaryda aıtylǵan Aqjaıyq aýdany turǵyndarynan bólek, Terekti aýdanynyń Qyzyljar, Shaǵataı aýyly turǵyndary da jańa kópirdiń ıgiligin paıdalanatyn bolady.
- Qysta muz oıylyp, kólikter sýǵa batsa, jazda paromnyń ústinen jyljyp ketip, talaı tehnıka sýǵa ketti. Kóktem jáne kúzde seń júrgende halyqtyń aýdan ortalyǵyna qatynaýy múldem qıyndaıtyn. Chapaev aýylyna taıaq tastam jerdegi Kónekketken men Qýraılysaıdan jetý úshin osy kezeńde Oral aınalyp, 250 shaqyrym jol júredi. Endi jol qatynasy bes, tipti on esege qysqardy. Bas aýyryp, baltyry syzdamaıtyn adam bolmaıdy. Jas ulǵaıdy, dimkástana qalsaq, aýdandaǵy aýrýhanaǵa jetý bir qııamet. Sonaý Oraldy aınalyp júrýimizge týra keletin. Endi, mine, aýyldan shyqqanymyzǵa jarty saǵat ta bolǵan joq. Zyrlatyp Chapaıǵa da jetip keldik. Sondyqtan halyqqa úlken jaǵdaı jasap, qanshama kúrmeýli máseleniń sheshimin taýyp otyrǵan oblys, aýdan basshylyǵyna alǵys bildiremiz, - deıdi Kónekketken aýylynan kópirdiń ashylýyna arnaıy kelgen aqsaqal Qarasha Hamıdýllın.
Jańa kópir qurylysy úshin oblystyq bıýdjetten 175 mln teńge bólingen. Uzyndyǵy 128 metrlik temir kópir bir mezette 60 tonnalyq salmaqty kótere alady. Jaıaý adamǵa arnaıy jolaq qarastyrylǵan. Elektr shamy ornatylǵandyqtan, kópirdi túnde de paıdalanýǵa kedergi joq. Merdiger qarasha aıynda aıaqtalýy tıis kópir jumysyn merziminenburyn iske qosqan.
- Toǵyz joldyń torabyndaǵy Chapaev aýylynyń tusynan salǵan bul qalqymaly kópir Aqjaıyq aýdanynyń damýyna, aýyl turǵyndarynyń turmys sapasynyń jaqsarýyna oń yqpal eteri sózsiz. Oǵan qosa, shaǵyn jáne orta bıznestiń damýyna jańa serpin bermek. Sebebi bul kópirmen tek Aqjaıyq aýdany ǵana emes, sondaı-aq kórshiles aýdan turǵyndary da qatynaıtyn bolady. El men eldi jalǵastyrǵan kópir ıgilikterińizge jarasyn, - dedi jańa kópirdiń ashylýyna oraı ótken saltanatty jıynǵa arnaıy kelgen Batys Qazaqstan oblysynyń ákimi Ǵalı Esqalıev.
О́ńir basshysy men eńbek ardageri Ǵılaj Luqpanov lenta qıyp, jańa nysandy iske qosqan soń kópirden qurmetti qonaqtar, Jaıyqtyń sol jaǵalaýyndaǵy aýyl turǵyndarynyń kólikteri sap túzep ótti.
Batys Qazaqstan
Sýretti túsirgen Nurbek IHSAN
