Aımaqtar • 02 Qyrkúıek, 2019

Aqtaý qalasynda О́zbekstan Respýblıkasynyń Bas Konsýldyǵy ashyldy

220 ret

kórsetildi

1 mın

oqý úshin

Aqtaý qalasynda О́zbekstan Respýblıkasynyń Bas Konsýldyǵynyń ashylý rásimi ótti. Bul baýyrlas qazaq pen ózbek elderiniń arasyndaǵy dostyq qarym-qatynasty odan ári nyǵaıtý jolyndaǵy mańyzdy sharalardyń biri. Tarıhı sáttiń taǵy bir ereksheligi - О́zbekstan Respýblıkasynyń Bas Konsýldyǵy Qazaqstan Respýblıkasynyń Konstıtýsııasy kúni jáne О́zbekstan Respýblıkasynyń Táýelsizdigi kúni aıasynda ashylýda. Sondaı-aq 2019 jyly О́zbekstan elinde Qazaqstannyń jyly dep jarııalanyp, joǵary deńgeıde uıymdastyrylýda.

Gúlaıym DÁÝITBAI

Aqtaý qalasynda О́zbekstan Respýblıkasynyń Bas Konsýldyǵy ashyldy

- Búgin qasıetti Mańǵystaý óńirinde tarıhı sáttiń kýási bolyp otyrmyz. Josparly túrde eki halyq arasyndaǵy ejelgi, tereń tarıhy bar mádenı jáne rýhanı baılanysymyz odan ári keńeıip keledi. Eki el arasyndaǵy dostyq qarym-qatynasymyz odan ári nyǵaıa bergeı, dedi Mańǵystaý oblysynyń ákimi Serikbaı Trumov.

Aıta keteıik, aǵymdaǵy jyldyń 17 shildesi kúni eki eldiń Úkimet basshylarynyń qatysýymen «Beıneý-Aqjigit-О́zbekstan» respýblıkalyq mańyzy bar avtojoly saltanatty túrde ashyldy. Bul eki memleket arasyndaǵy ekonomıkalyq jobalardy iske asyrýǵa úlken serpilis beretini anyq.

2019 jyldyń tek birinshi jartyjyldyǵynda Mańǵystaý oblysynyń О́zbekstan Respýblıkasynyń arasyndaǵy taýar aınalymy 1,5 mln AQSh dollaryn qurady. Bul kórsetkish ótken jylmen salystyrǵanda 4,3% joǵary.

Sonymen qosa, Mańǵystaý oblysynda búgingi kúni ártúrli salada ózbek kapıtalynyń qatysýymen 33 birikken kásiporyndary jumys jasaıdy.