Qazaqstandyq jáne sheteldik joǵary áskerı oqý oryndary men Qorǵanys Mınıstrliginiń Kadet Korpýsyn aıaqtaǵan bıylǵy túlekter «Batys» óńirilik qolbasshylyǵyna kelip, Aqtaý qalasynda alǵashqy oqý jıyndarynan ótýde. On kúndik jıynnyń barysynda jas áskerı qyzmetshilermen jaýyngerlik daıarlyqtyń negizgi pánderi boıynsha sabaqtar, áskerı tehnıka men qarý-jaraqty qoldaný, jeke qurammen jumys jasaýdy uıymdastyrý boıynsha trenıngter ótýde. Jıynnyń basty maqsaty – olardyń oqý ornynan áskerı bólimge kelgendegi adaptasııasyn jeńildetý, laýazymyn qabyldar aldyndaǵy kerek keńesterdi berý, tárbıe jumysy men jeke quramdy oqytý barysyndaǵy erekshelikterdi túsindirý bolyp tabylady. Bıylǵy jyly «Batys» óńirlik qolbasshylyǵyna 60-tan astam jas ofıserler men 70-ke jýyq jas serjanttar kelip qosyldy, olar Aqtaý, Aqtóbe jáne Atyraý garnızondaryndaǵy áskerı bólimderi boıynsha joldama aldy.
Sonymen qosa, jıyn barysynda jas ofıserler men serjanttar Qarýly kúshterdiń ardagerlerimen, áskerı qyzmetshilerdiń otbasylarymen jumysty uıymdastyrý qyzmeti ókilderimen kezdesip, bata-keńesterin aldy. Otyrys sońynda Qurlyq Áskerleriniń Áskerı ınstıtýtynyń 2018 jylǵy úzdik túlegi leıtenant Oljas Qýandyqovtyń bir jyl ishinde eńbek jasap, az ýaqytta qatarynan birinshi bolyp rota komandıri dárejesine jetý jolyndaǵy qupııalarymen bólisti.
Jıyn qorytyndysy boıynsha úzdikterdiń qatarynda leıtenant Jumaǵazıev Erdos (30238 áskerı bólimi, Aktobe q.) jáne leıtenant Ǵalymzat Nurıslam (99116 áskerı bólimi, Beıneý aýyly) kórindi. Shoqan Ýalıhanov atyndaǵy Kadet Korpýsynyń túlekteri arasynan kishi serjant Ádilet Serikbaev (41433 áskerı bólimi, Atyraý q.) kózge tústi. Olar taktıkalyq, dene jáne atys daıyndyǵynan jaqsy nátıjeler kórsete bildi. Sonymen qosa, jas ofıserlerdiń arasynda Qytaı Halyq Respýblıkasynda oqyp kelgen túlekter de boldy, jaqyn arada Túrkııadaǵy «Gúlhane» Áskerı-medısınalyq Akademııada oqyǵan medısına qyzmetiniń leıtenanttary kelýi tıisti.
- Birneshe jyldan beri jas ofıserler men serjanttardyń jıynyń ótkizip kelemin. Onyń barysynda jyl saıyn jas ofıserlerdiń teorııalyq daıyndyǵynyń jáne kásibı ázirliginiń artyp jatqan tendensııasyn baqylaýdamyn. Bul óz kezeginde áskerı kadrlardy daıyndaý kezindegi tııanaqtylyq pen jaýapkershiliktiń bar ekenin, jeke quramnyń áskerı ómirge tolyq daıyn komandırlerdiń qolyna tapsyrylyp jatqanyn bildiredi, deıdi «Batys» óńirlik qolbasshylyǵyn áskerleri qolbasshysynyń orynbasary tárbıe jáne ıdeologııalyq jumystary jónindegi orynbasary polkovnık Serik Seıitbaev.
Jıynnyń aıaqtalýymen jas ofıserler men serjanttar alǵash laýazymdaryna taǵaıyndalyp, óz mindetterin oryndaýǵa kirisedi.
