Memleket basshysy búgingi Joldaýy arqyly elimizde saıası básekeniń óskenin, kóppartııalylyqty damytýdy, dıalogty kúsheıtýdi kózdep otyr. Meniń oıymsha, Prezıdent lıberaldaný baǵdaryna den qoıyp otyrǵanyn taǵy bir márte dáleldedi. «Reforma úshin reforma júrgizýdiń» qajeti joq ekenin ashyq bildirip, reformalardy iske asyrýda oıly da salmaqty qadamdar qajettigin aıtty.
Áleýmettik jeliniń reaksııasyna qarap, Prezıdenttiń saıası básekelestikti damytýǵa, kóppartııalylyqty damytýǵa qatysty aıtqandary oń qabyldanǵanyn baıqadym.
Memleket basshysynyń saıası keńesshisi retinde qoǵamdyq dıalogty damytý, azamattyq dıalogty kúsheıtý týraly bastamalaryn erekshe atap óter edim. Árıne shaǵyn jáne orta bıznesti damytý bastamasynyń da mańyzy erekshe. Prezıdent Úkimetke shaǵyn bıznesti salyqtan úsh jylǵa bosatý týraly zańnamalyq negiz ázirleýdi tapsyrdy. Menińshe, osy iske qatysty tıisti zańnamalar kásipkerlikti damytýda aıtarlyqtaı serpin beredi.
Bir jaǵynan, Prezıdent tarapynan halyqty áleýmettik qorǵaýǵa qatysty kóptegen sharalar, bastamalar men tapsyrmalar aıtyldy. Ekinshiden, azamattardyń ekonomıkalyq belsendiligin kóterý úshin kásipkerlikti qoldaý qajettigine toqtaldy. Úkimettiń atqarýǵa tıis jumysy týraly naqty tapsyrmalar kóp boldy. Menińshe, Úkimet tarapynan tıisinshe talqylaý bolyp, Prezıdent tapsyrmalaryn iske asyrý jónindegi jalpyulttyq jospar jasalady.
Erlan QARIN,
Qazaqstan Prezıdentiniń keńesshisi
