«Atameken» UKP Almaty qalasynda qosymsha mamandyqtardy ıgerý boıynsha tegin kýrstar oqyta bastady. Qysqa merzimdi oqytý nátıjeli jumyspen qamtý jáne jappaı kásipkerlikti damytý baǵdarlamasy sheńberinde uıymdastyrylǵandyqtan bilim alýshylar úshin oqý aqysy tegin ári shákirtaqy qarastyrylǵan.
Qysqa merzimdi kásiptik oqytý kýrstary jumys izdep júrgen ári jumyssyz azamattar úshin tıimdi. Bir aıdan bastap alty aı merzimge sozylatyn oqytý kýrstaryna Almaty qalasynyń jumyspen qamtý, sondaı-aq «Atameken qoldaý ortalyǵy» mobıldi ortalyǵynda jazylýǵa bolady. Qazir 85 oqý ortalyǵy ashylǵan. Talapkerler úshin qyryqqa jýyq mamandyqtyń birin tańdaý múmkindigi bar.
Almaty qalasy Kásipkerler palatasynyń Adamı kapıtaldy damytý bóliminiń basshysy Vera Szın atap ótkendeı, qysqa merzimdi kásiptik oqytý kásiporyndar bazasynda uıymdastyrylady. Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń alǵashqy baǵyty boıynsha bıyl «Atameken» UKP bilim berý uıymdarynyń tizimine qosymsha 65 bilim berý uıymy engen. Osy baǵytta sońǵy eki jylda 20-ǵa jýyq oqý ortalyǵy ashylsa, qazirgi kezde olardyń qatarynda 85 bilim berý uıymy, onyń ishinde 53 kásiporyn men qaýymdastyq, 10 derbes ortalyq pen 22 kolledj bar.
ALMATY
