Aıtýly jarysta Qazaqstan quramasy qos kúmis medaldi ıelendi. 12 jasqa deıingi qyzdardyń básekede Alýa Nurmanova men Galına Mıheeva 9,5 upaıdan jıyp, ózgelerlerden qara úzip ketti. 8 jasqa deıingi uldardyń saıysynda da dál sondaı jaǵdaı qaıtalandy. 9 upaıdan oljalaǵan Dinmuhamed Tólendınov pen Artem Lebedev jarys kestesinde kósh bastady. Alaıda qosymsha kórsetkishter boıynsha bas júlde Reseıden kelgen qos shahmatshyǵa buıyryp, bizdiń órender kúmis medaldi qanaǵat tutty. Sondaı-aq Raıana Jumaǵalı (8 jasqa deıin) men Edgar Mamedovtiń de (10 jasqa deıin) óneri kórermenderdiń kóńilinen shyqty. Olardyń qoldary júldege sál ǵana jetpedi. Raıana tórtinshi orynǵa turaqtasa, Edgar besinshi satyǵa taban tiredi.
- Álem birinshiligindegi shákirtterimniń nátıjesine kóńilim toldy. Alýa 88 sportshydan ozsa, Dinmuhammed 94 qarsylasyn artqa tastady. Árıne, bul óte jaqsy kórsetkish. Qazaqstannyń balǵyn shahmatshylary aldaǵy ýaqytta da tolaǵaı tabystarǵa jetip, óz jankúıerlerin qýantady degen oıdamyn, – deıdi elimizdiń balalar men jasóspirimder quramasynyń jattyqtyrýshysy, grossmeıster Ánýar Ismaǵambetov.
