Byltyr «Mektepke jol» aksııasy kezinde elimiz boıynsha 328 766 oqýshyǵa 2 mlrd 822 mln 846 myń teńgeniń kómegi jasalǵan. Bul kómek mektep formasy, oqý quraldary túrinde, sonymen qatar qarjylaı da berilipti. Bıyldan bastap aksııanyń jyl boıy jalǵasatynyn eskersek, jınalatyn qarjy kólemi budan da óse túsýi múmkin ári qamtylatyn oqýshylar sany da artýy ǵajap emes. Shildeden beri qaıyrymdylyq jasaý úshin jyljymaly pýnktter qurylyp, mobıldi toptar jumys isteýde. Oqý jyly bastalar tusta aksııa tipten qarqyn alǵan jaıy bar.
Jaqynda «Samruk-Kazyna Trust» Áleýmettik jobalardy damytý qory az qamtylǵan jáne kóp balaly otbasylar, jetim balalar men ata-anasynyń qamqorlyǵynsyz qalǵan balalar arasynan 3 myńnan astam oqýshyny mektepke daıyndady. Sóıtip qor osynsha oqýshyǵa sómkeler men keńse taýarlaryn satyp alýǵa kómek kórsetti. Muqtaj oqýshylar tizimin qorǵa Nur-Sultan qalasynyń ákimdigi usyndy. Qor oqýshylarǵa qajet qural-jabdyqtardy sabaq bastalǵanǵa deıin úlestirip berdi. Qor qaıyrymdylyq sharasynyń alǵashqy kezeńinde «Jas shýaq» balalar lageriniń 360 demalýshysyna mektepke qajet zattar bergen edi. Bul lager 1 shildeden 9 tamyzǵa deıin az qamtamasyz etilgen jáne kóp balaly otbasylarynyń balalary, ata-anasynyń qamqorlyǵynsyz qalǵan balalar úshin uıymdastyrylǵan bolatyn. Jıynǵa qatysqan Nur-Sultan qalasy Bilim basqarmasynyń bastyǵy Ánýar Janǵozın qalada qaıyrymdylyq sharalary jalǵasyp jatqanyn aıta kele, jalpyǵa mindetti bilim berý qory sheńberinde byltyr 1700-deı balaǵa kómek kórsetilse, bıyl arnaıy kómek alatyn oqýshylar sany 11 myńnan asqanyn tilge tıek etti. «Bul tizimge kirmegen oqýshylar «Mektepke jol» aksııasy boıynsha demeýshilerdiń qoldaýymen kerek-jaraqtarmen qamtamasyz etiledi. Jańa oqý jylynda 14 myńnan asa shákirtke belgili bir taraptardan osyndaı kómek beriledi», dedi basqarma basshysy.
