Jańa depýtattar ant berdi
Alqaly jıynǵa Májilis Tóraǵasy Nurlan Nyǵmatýlın tóraǵalyq etti. Ol aldymen kún tártibindegi taqyryptarǵa toqtalmas buryn, Parlamenttiń kezekti sessııasynyń ashylýynda alǵash ret Prezıdent Qasym-Jomart Toqaevtyń Joldaýyn jarııalaǵanyna nazar aýdardy.
– Memleket basshysy Qasym-Jomart Toqaev óz Joldaýynda Elbasymyz Nursultan Nazarbaevtyń saıasatyn jalǵastyra otyryp, Qazaqstanymyzdy odan ári damytýdyń negizgi maqsattaryn belgilep berdi. Olardyń barlyǵyn zań jaǵynan qoldaý úshin depýtattyq korpýstyń aldynda da jaýapty mindetter tur. Sol úshin sessııa barysynda biz óz ýaqytynda halyqqa qajetti, sapaly zańdar qabyldaıtyn bolamyz. Sondyqtan osy jaýapty mindetti abyroımen atqarý úshin búginnen bastap belsene iske kirisý qajet, – dedi Nurlan Nyǵmatýlın.
Májilis Tóraǵasy ekonomıkany jańǵyrtýǵa, áleýmettik ahýaldy kúsheıtýge, bıýdjet jáne salyq júıesin jetildirýge, azamattardyń quqyqtary men bostandyqtaryn qorǵaýǵa, shaǵyn jáne orta bıznesti qoldaýǵa, ekologııalyq jáne basqa da máselelerge erekshe kóńil bólinetinin atap ótti.
Nurlan Nyǵmatýlın depýtattarǵa Prezıdenttiń jáne Úkimettiń Parlamenttegi ókilderin tanystyryp, memlekettik organdar arasyndaǵy birlesken jumystardy nyǵaıtýǵa yqpal etetinine senim bildirdi. Prezıdenttiń ókili bolyp jańadan Beıbit О́ksikbaev, al Úkimettiń ókili bolyp Ermek Amanshaev taǵaıyndaldy.
Sonymen qatar otyrysta Májilistiń jańa depýtattary Gúlshara Ábdiqalyqova, Nurjan Áshimbetov jáne Juldyz Omarbekova ant berdi. Olar iske kiriser aldynda «Qazaqstan halqyna adal qyzmet etýge, Qazaqstan Respýblıkasynyń tutastyǵy men táýelsizdigin nyǵaıtýǵa, onyń Konstıtýsııasy men zańdaryna qatań baǵynýǵa, depýtattyń ózime júktelgen mártebeli mindetin adal atqarýǵa ant etemin» dedi.
Májilis Tóraǵasy Nurlan Nyǵmatýlın Parlament komıtetteri men komıssııalary týraly zańnyń 8-babyna sáıkes Májilistiń Áleýmettik-mádenı damý komıtetiniń tóraǵasy qyzmetine Gúlshara Ábdiqalyqovanyń kandıdatýrasyn usyndy. Bul usynysty 104 depýtat túgel maquldady.
Sondaı-aq jańa depýtattar Nurjan Áshimbetov Agrarlyq máseleler komıtetiniń, Juldyz Omarbekova Zańnama jáne sot-quqyqtyq reforma komıtetiniń quramyna saılanyp, tıisti qaýlylar qabyldandy.
Buǵan qosa jalpy otyrysta Májilis depýtattary Baqtııar Máken men Gúlnar Iksanovanyń ókilettikteri merziminen buryn toqtatyldy.
Zań jobalaryn ázirleý jaıy talqylandy
Májilis otyrysynyń kún tártibinde birqatar Zań jobasy jóninde qorytyndy ázirleý týraly máseleler qaraldy. Aldymen Qarjy jáne bıýdjet komıtetiniń tóraǵasy Gúljan Qaraqusova depýtattar nazaryna zań jobalaryna ózgerister men tolyqtyrýlar engizýdi usyndy. Onyń birinshisi «Astana» halyqaralyq qarjy ortalyǵyna qatysty boldy. Odan keıin Ulttyq qordan 2020-2022 jyldarǵa arnalǵan kepildendirilgen transfert týraly usynysyn jetkizdi.
– Atalǵan zań jobasynda Ulttyq qordan 2020-2022 jyldarǵa arnalǵan respýblıkalyq bıýdjetke beriletin kepildendirilgen transfert mólsherlerin bekitý kózdeledi. Munyń kólemi 2020-2021 jyldary 2,7 trln teńge mólsherinde anyqtalady. 2022 jyly 2,6 trln teńgege deıin tómendetiledi. Qarjy jáne bıýdjet komıteti bul zań jobasy boıynsha 2019 jyly 6 qarashaǵa deıin qorytyndy ázirleýge daıyn, – dedi Gúljan Qaraqusova.
Sonymen birge 2020-2022 jyldarǵa arnalǵan respýblıkalyq bıýdjet týraly zań jobasy ázirlenedi. Sondaı-aq keıbir zańnamalyq aktilerge qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl boıynsha joba qaraldy.
– «Pedagog mártebesi týraly» zań jobasy Tuńǵysh Prezıdenttiń 2018 jyldyń 5 qazanyndaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna sáıkes ázirlendi. Zań jobasy bilim berýdiń barlyq deńgeıdegi uıymdary salasynda týyndaıtyn qarym-qatynastardy retteýdi qamtamasyz etetin quqyqtyq tetikti jetildirýge, pedagog qyzmetiniń ózekti áleýmettik jáne kásibı máselelerin tıimdi sheshýge baǵyttalǵan. Sondaı-aq pedagogtardyń eńbegin yntalandyrý, onyń ishinde qosymsha aqylardy arttyrý, ózderine tán emes fýnksııalardan bosatý sharalary kózdelgen. Komıtet osy zań boıynsha jumys isteýge jáne 25 jeltoqsanǵa deıin qorytyndy shyǵarýǵa daıyn, – dedi Áleýmettik-mádenı damý komıtetiniń hatshysy Beıbit Mamraev.
Sonymen qatar jalpy otyrysta birqatar halyqaralyq kelisimshartty ratıfıkasııalaý týraly zań jobalaryn daıyndaý qarastyryldy. Solardyń qatarynda Qazaqstan Úkimeti men Armenııa Úkimeti arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi qabyldaý máselesi talqyǵa salyndy. Bul zań jobasyn Ishki ister mınıstri Erlan Turǵymbaev tanystyrdy.
– Kelisimdi ratıfıkasııalaý eń aldymen tótenshe jaǵdaıdy boljaý salasynda tájirıbe almasýǵa, qaýip tóngen jáne týyndaǵan jaǵdaıda halyqty daıyndaýǵa septigin tıgizedi. Ekinshiden, taraptardyń oqý oryndarynda azamattyq qorǵaý salasynda mamandardy oqytýǵa, úshinshiden, taraptar aýmaǵynda bolǵan tótenshe jaǵdaılardy joıýda kómek kórsetýge múmkindik beredi. QR Zańnamasy sheńberinde kelisimde kómek kórsetý men jedel áreket etý, qutqarý bólimsheleriniń shekarany jeńildetip kesip ótý jáne taraptar aýmaǵynda bolý sharttary bar. Tótenshe jaǵdaıdy joıýda qutqarý quraldaryn alyp kirý máselesi rettelgen. Buǵan deıin mundaı kelisim Reseı, Belarýs, Qyrǵyzstan, Ázerbaıjan, Tájikstan, Ýkraına, Grýzııa memleketterimen jasalǵan. Barlyǵy 17 ekijaqty, 13 kópjaqty kelisim bar, – dedi mınıstr.
Sondaı-aq Erlan Turǵymbaev atalǵan kelisim sheńberinde armıan tarapymen seısmıkalyq qaýipsizdikti, onyń ishinde jedel habarlaý men halyqty evakýasııalaýdy arttyrý jóninde tájirıbe almasý qarastyrylǵanyn, zań jobasynyń keri áseri joqtyǵyn jáne qosymsha qarjylaı shyǵyndy talap etpeıtinin aıtty.
Bul zań jobasy týraly usynysty tyńdaǵan 104 depýtat qoldaý bildirip, qaýly qabyldady.
