Osy oraıda Qazaqstan Respýblıkasynyń Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda bizdiń memlekettigimizdiń qazaqstandyq modelin odan ári nyǵaıtýǵa jete kóńil bólgeni jáne ony keńinen jarııalaýy kóńilge úlken senim uıalatty. Sebebi memleketti basqarý isi, jergilikti ult quraýshy halyqtyń dinine, mentalıtetine, dástúrine saı bolyp, azamattardyń kóńil údesinen shyǵýy kerek.
Elbasy Nursultan Nazarbaev negizin qalaǵan memleketti jańǵyrtý ýaqyt talabynan týyndap otyrǵany málim. О́ıtkeni qazirgi tańda «Jańa jarııa menedjment», «Aqparatty úkimet», «Jelilik úkimet», «Shaǵyn úkimet» sııaqty tujyrymdardyń ishine qazaqstandyq «Estıtin úkimet» tujyrymdamasy da búgingi kún talabynan týyndap otyrǵan bastama. Bul turǵyda Memleket basshysy bylaı dedi: «Azamattardyń barlyq syndarly ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasyn iske asyrý – bárimizge ortaq mindet. Bılik pen qoǵam arasynda turaqty dıalog ornatý arqyly ǵana qazirgi geosaıası ahýalǵa beıimdelgen úılesimdi memleket qalyptastyrýǵa bolady.
Bul baǵytta búginde birqatar ister qolǵa alyndy. Atap aıtqanda, bılik belgili qoǵam ókilderin qamtıtyn Ulttyq qoǵamdyq senim keńesin qurdy. Qoǵammen dıalog ornatý maqsatynda jáne rotasııalyq tártippen jumys isteıtin keńestiń búgin alǵashqy otyrysy ótti. Elimizdi damytýǵa jáne jańǵyrtýǵa baǵyttalǵan bastamalar men usynystardy pysyqtaý isindegi Ulttyq qoǵamdyq senim keńesiniń atqaratyn róli zor bolatynyna senimdemiz.
Memlekettiń halyqtyń talaby men tilegin eskerýi mańyzdy. Sonda ǵana halyq pen memleket arasynda suhbat ornap, Konfýsıı aıtqanyndaı «Bıleýshi ádil bıleýshi, halyq tolyqtaı baǵyný» ıdeıasy júzege asady. Munda halyqtyń sózsiz baǵynýy – zańǵa degen qurmet, qoǵamdyq qaýipsizdik pen turaqtylyqtyń saqtalýy, otanǵa degen súıispenshilik jáne patrıotızm.
Shet elderdiń tájirıbelerine negizdeı otyryp áleýmettik, etnıkalyq jáne taǵy da basqa shıelenisterdiń aldyn alý, oryn alǵan jaǵdaıda qajetti arnaǵa bura bilý úshin, halyq tyǵyz qonystanǵan óńirlerdegi joǵary oqý oryndarynyń janynan halyqtyń kóńil-kúıi men suranystaryn zerdelep otyrý maqsatynda arnaıy zertteý ortalyqtaryn qurý ýaqyt suranysy. Atalǵan ortalyqtar jahandaný úrdisine beıimdele otyryp, ishki saıası ózgeristerge áser etetin halyqaralyq ózgeristerdiń saldaryn baǵamdaýǵa, teris áreketterdiń aldyn alýǵa jáne jedel sharalar qabyldaýǵa yqpal eter edi.
Joldaýda Qazaqstan Prezıdentiniń saılaýaldy baǵdarlamasyndaǵy «halyqqa bergen ýádelerin mindetti túrde oryndaımyn» dep aıtqany kópshiliktiń kóńil údesinen shyqty ári senim uıalatty. El damýynda mańyzy zor qujattyń áleýmettiń áleýetin arttyrýǵa jáne tarıhy tereń Qazaq eliniń «Máńgilik el» bolýyna nyq qadam jasady.
Darııa QOJAMJAROVA,
M. Áýezov atyndaǵy OQMÝ rektory, QR UǴA akademıgi
