«QazMunaıGaz» 2016 jyldan beri jumysshy kásipterdi ilgeriletýge baǵyttalǵan «Úzdik maman» dástúrli kásibı sheberlik baıqaýyn ótkizýde. Bıyl otandyq munaıshylar alǵash ret halyqaralyq deńgeıde óner kórsetti. Onyń basty maqsaty – tájirıbe almasý jáne mamandardy oqytý, kompanııalar arasyndaǵy ózara yqpaldastyqty nyǵaıtý.
Tórt kúnge sozylǵan baıqaýdyń barysynda «QazMunaıGaz» tobyna kiretin 26 kompanııanyń 182 qyzmetkeri saıysqa tústi. Aıta keteıik, olar birinshi kezeńde óz ujymdarynda úzdik atanǵan bolatyn.
Qazaqstandyq mamandar gaz ben munaıdy óndirý operatory, jer qabatyndaǵy qysymdy saqtaý operatory, tehnologııalyq qondyrǵynyń operatory, slesar-jóndeýshi, taýar operatory, kompressorlyq qondyrǵynyń mashınısti, tehnologııalyq qondyrǵylardyń mashınısti, tokar, sementteý qondyrǵysynyń mashınısti, hımııalyq taldaý laboranty, elektr-gazben dánekerleýshi, elektr qondyrǵylardy jӛndeý men qyzmet kórsetý boıynsha elektr monteri, uńǵylardy jer asty jóndeý brıgadasy, uńǵylardy kúrdeli jóndeý brıgadasy jáne t.b. sekildi 18 nomınasııa boıynsha baq synady.
Ádil qazylyqty «Tatneft» JAQ mamandary júzege asyrdy. Qazylar alqasy qatysýshylardyń daǵdylary men teorııalyq bilimderin baǵalady.
Basqarma tóraǵasynyń orynbasary Dáýren Qarabaev sharanyń saltanatty ashylý rásimine qatysqan Tatarstan Prezıdenti Rýstam Mınnıhanov pen «Tatneft» JAQ basshysy Naıl Maǵanovqa qazaq munaıynyń 120-jyldyǵyna arnalǵan medaldardy tapsyrdy.
-Sharany sapaly ótkizý úshin baryn salǵan aǵaıyndarǵa sheksiz alǵysymyzdy bilidiremiz. Baıqaýdyń nátıjesi boıynsha korporatıvtik rýh kúsheıedi, jumysshylarymyz kásibı sheberligin arttyrady jáne tájirıbesin molaıtady degen senimdemin, dedi D. Qarabaev.
Baıqaýdyń qorytyndysy boıynsha barlyq derlik kompanııalar jaqsy nátıje kórsetti. Tatarstandyq áriptester jerlesterimizdiń joǵary kásibıligi men daıyndyq deńgeıin atap ótti.
Esterińizge sala keteıik, ústimizdegi jyldyń shildesinde «QazMunaıGaz» ben «Tatneft» ózara túsinistik týraly memorandýmǵa qol qoıǵan bolatyn. Qujatta Qazaqstan men Reseı aýmaǵynda geologııalyq zertteý jáne birlesken geologııalyq barlaý jumystaryn júrgizý; munaı óndirýdiń jańa tehnologııalaryn engizý jáne óndiristi sıfrlandyrý boıynsha tájirıbe almasý salasyndaǵy yntymaqtastyqtyń boljamdy baǵyttary aıqyndalǵan.
Mańǵystaý oblysy
