Aýyldyq jerlerdegi ómir sapasyn jaqsartý maqsatynda qaıyrymdylyq sharasyn qolǵa alǵan «Aıtyman» qoǵamdyq qorynyń dırektory J.Álimbaıqyzynyń aıtýynsha, tórt otbasyn baspanaly etken asarǵa aýyl azamattary, jastar, kórshiler men mektep oqýshylary da atsalysqan. Biri baspananyń irgetasyn quısa, ekinshisi qabyrǵasyn qalapty.
– Endi biri shatyryn jaýyp, sylaǵyn júrgizgeniniń nátıjesinde bul baspana nebári 45 kúnde salynyp bitti. Jazdyń aptap ystyǵyna qaramastan qurylysy qarqyndy júrgen úıdiń kiltin alǵan páter ıeleriniń qýanyshy bárin mereılendirdi. Osy saýapty is arqyly aýyl azamattaryna erekshe rızashylyǵymdy bildiremin, qurylysqa atsalysqan aýyl azamattary ózara uıymshyl ekendikterin taǵy bir dáleldedi, – deıdi ol.
Páter kilti tabystalar sharada Mańǵystaý aýdanynyń ákimi T.Kóshmaǵanbetov izgi iske bastamashy bolǵan J.Amanqulova men B.Jakýpovaǵa aýdan turǵyndary atynan alǵys bildirip, turǵyn úıdi salýǵa qarjylaı kómek kórsetken «Mańǵystaýmunaıgaz» AQ bas dırektory Lıý Szınchenge, «QazAzot» AQ «Shaǵyrly-Shómishti» fılıaly JShS dırektory A.Meńdibaevqa, «Tehnologııalyq kólik jáne uńǵymalarǵa qyzmet kórsetý basqarmasy» JShS dırektory J.О́skinbaıulyna, «BozashyTransQurylys» JShS dırektory E.Esbolatulyna, qurylysty salǵan N.Dúısenbıevke alǵys hat tabystady.
– Baspanaly bolý baqyty buıyrǵanyna qýanyshtymyn. Jaqsy iske muryndyq bolǵan qos qyzǵa, asarǵa atsalysqan barlyq azamattarǵa rızamyn, – deıdi qýanysh ıesi Juldyz Ońaıbaeva.
Mańǵystaý oblysy
