«Tuńǵysh Prezıdent-Elbasy Nursultan Nazarbaev elordany gazdandyrýdy tapsyrdy. Búgin jeli qurylysy bastaldy. Jobanyń iske asyrylý merzimi de, sapasy da qatań baqylaýda bolady. Kelesi jylý berý maýsymy bastalǵanǵa deıin adamdar gazdy úıge ótkizip úlgerýi úshin, jobanyń birinshi kezeńin 2020 jyldyń jazynda aıaqtaý kerek. Tehnıkalyq qadaǵalaý tósemniń tereńdigin, jylý oqshaýlaý normalaryn, gaz qubyrlarynyń túıisýlerin jáne oryndalatyn jumystyń sapasyn zerdeleýge tıis. Merzimi boıynsha tezdetý kerek» dedi elorda ákimi Altaı Kólginov.
Sondaı-aq jobanyń birinshi kezegi JEO-1,2,3, Kóktal-1,2, Jeleznodorojnyı kenti, Ońtústik-Shyǵys (oń jáne sol) deıin gaz taratý jelilerine otyn berýdi kózdeıdi. 1 kezeń aıaqtalǵan soń 13,5 myń úıdiń turǵyndary gazǵa qol jetkize alady. Jobanyń ekinshi kezegi - Mıchýrıno, Internasıonalnyı, Kúıgenjar (1-2 PK), Telman (3 PK), Prıgorodnyı, Garden Village, Family Village (4 PK) turǵyn alaptary. Úshinshi kezekte Ilınka (1-2-shi DK), Shubar (3-shi DK), О́ndiris (4-shi DK) turǵyn alaptary gazdandyrylady.
Jobalaýshylardyń aıtýynsha, gaz taratý jelileri kóshe jelisi boıynsha júrgiziletin bolady, esepteýishter qarastyrylǵan. Jeke sektor turǵyndary gazdy tikeleı kóshe jelisinen úılerine qosady.
Gaz ótkizý atmosferadaǵy zııandy qaldyqtardy 6 esege, qatty zattardy 35 myń tonnaǵa azaıtýǵa múmkindik beredi.
https://www.instagram.com/akimat_nur_sultan/
