Mırhat Ahtarov – Qurmanǵazy Saǵyrbaev atyndaǵy orta mekteptiń aǵylshyn tili páni muǵalimi bolsa, áriptesi Tilekjan Begıshanov – ınformatıka páninen sabaq beredi. Jańa saıtty daıyndaý úshin jigitter úsh aı ýaqyt jumsapty.
Saıt oqyrmandaryna aǵylshyn tili men orys tilin qosyp úırenýdiń qyzyqty joldaryn usynbaq. Mundaǵy til kýrsy tórt deńgeıden turady. Alǵashqy satyda saıt paıdalanýshylary sózdik jattasa, ekinshi deńgeıde kúndelikti turmystyq jáne qyzmettik qarym-qatynasty dıalog túrinde úırenedi eken. Úshinshi sabaqta belgili shetel oryndaýshylarynyń ánderi jáne sol ánniń kaver nusqasy qosa berilmek. «Iаǵnı óleńmen birge sol ánniń tekstine qarap oryndaıtyn bolasyzdar. Al tórtinshi deńgeıde beınesabaqtarmen jumys isteımiz» - deıdi saıt avtorlary.
– Saıttyń qoldanylýy óte qarapaıym. Kez kelgen adam paıdalana alady dep oılaımyz. Orystildi qoldanýshyǵa arnalǵan nusqamyz da ázir. Qazirgi zamanda úsh tildi jetik bilý mańyzdy. Sol jolda bul saıt taptyrmaıtyn qural bolady, -deıdi joba avtorlarynyń biri Tilekjan Begıshanov.
Qarapaıym aýyl muǵalimderi ashqan www.eneasy.kz saıty bıylǵy jańa oqý jylynan bastap qosylǵan edi. Tilekjan qazirdiń ózinde úsh adam saıtqa tirkelip, til úırenýge kirisip ketkenin aıtady.
