Aǵaıyndy Ańqaýovtardyń erekshe tehnıkamen óńdelgen týyndylary kórmege qoıyldy

Sharanyń maqsaty – qolóner sheberleri, osy saladaǵy jastar shyǵarmashylyǵyna qoldaý bildire otyryp, qoldanbaly óner týyndylaryn tanytý jáne nasıhattaý. Sonymen qatar, qoldanbaly óner boıynsha jańa tehnologııalyq izdenister qoldanýda jańa baǵytty tanystyrý.

Qoldanbaly óner – halyqtyń mádenı ómirin kórsetetin sala. Bul óner túri ótkenimiz ben búginimizdi ortaq bir arnada toǵystyrady. Qolóner týyndylarynyń arasynda kıiz ónimderin erekshe ataǵan jón. Sebebi erte dáýirden halyq mádenıetine engen bul ónimder búkil eldiń tarıhyn, rýhanı ómirin nasıhattaıdy.

Aǵaıyndy Ańqaýovtar – Qostanaı óńiriniń azamattary. О́zderiniń zor izdenisteri, eńbekteri, zor talanttyń nátıjesinde qoldanbaly ónerdiń jaýhar týyndylaryn dúnıege ákelgen. О́z shyǵarmalarynda qoı júniniń erekshe tehnıkamen óńdelgen túrin keńinen qoldanady. Olar qoldanǵan jańa tehnologııalyq baǵyt – kıizdi keskindeme jaǵynan kórsetý. Sonymen qatar atalǵan kórmege elimizdiń túrli aımaqtaryndaǵy sheberlerdiń  kıiz ben gobelennen jasaǵan eńbekteri, «Arlan Design» sýret galereıasynyń týyndylary, Qazaq Ulttyq óner ýnıversıtetiniń pedagogtary men stýdentteriniń shyǵarmalary usynylyp otyr.

Kórmeniń ashylý saltanatynda sóz alǵan QR Ulttyq mýzeıiniń dırektory Arystanbek Muhamedıuly: «Qazirgi kúni elimizdiń sán-saltanaty jarasqan osyndaı ýaqytta óńirlerdegi ár jas talantqa qamqorshy bolyp jatqan «QazaqGeography» respýblıkalyq qoǵamdyq birlestiginiń uıymdastyrýymen búgin Ulttyq mýzeıde erekshe kórme ashylyp otyr. Jas talanttardy qoldap, olardyń keleshegine jol ashý úshin atalǵan uıym aýqymdy jumystar atqaryp júrgenin atap aıtqan jón. Kórmeni uıymdastyrýshylarǵa, Qazaq Ulttyq óner ýnıversıtetine alǵys bildiremin», - dedi.

«QazaqGeography» respýblıkalyq qoǵamdyq birlestigi Qazaqstan men ózge memleketterdegi geografııa jáne qoǵam, tabıǵat, mádenıet ǵylymdaryn ózara úılestirip, túrli jańalyqtardy damytý boıynsha jetekshi uıym bolýdy kózdeıdi. Bul qoǵamdyq birlestik qazirgi ýaqytta atalǵan salalar boıynsha óz elimiz ben shet memleketter týraly sapaly bilim berý negizinde túrli jobalardy júzege asyrýda.

Qoǵam qaıratkeri Myrzataı Joldasbekov: «Bulaq kórseń, kózin ash» degen halyqta maqal bar. Jas talanttarǵa mán berip, kóńil aýdaryp, olardyń Ulttyq mýzeıde kórmesin ótkizip jatqan azamattarǵa alǵys aıtamyn. Aǵaıyndy balalardyń eńbekteri qoıylypty kórmege. Baryn halqymen, osy jerdegi jaqyndarymen bólisip, óz týǵan jerine qyzmet etse, odan artyq baqyt joq dep oılaımyn.  Kórmege kóz júgirtip, aralap shyqtym. Keremet eńbek eken. Esh qıyndyqqa moıymaı, qyzmet etip júrgen tórt aǵaıyndyǵa da shyn júrekten alǵysymdy aıtamyn. Kórme qutty bolsyn!», - dep jyly lebizin bildirdi.

Buǵan deıin habarlaǵandaı kórme 30 qyrkúıekke deıin jalǵasady.