Nátıjesinde 8 palýan shırek fınalǵa ótip, ózara beldesýge daıyndaldy. Olardyń arasynda «Álem barysynyń» eki dúrkin, «Qazaqstan barysynyń» eki dúrkin jeńimpazy, Qazaqstannyń birneshe dúrkin «Túıe palýany», 22 avtokólik ıegeri A.Nuǵymarov, «Qazaqstan barysynyń» kúmis, eki ret qola júldegeri R.Ábdirazaqov, Túrkistan oblysynan kelgen «Álem barysynyń» kúmis júldegeri, Qazaqstannyń birneshe dúrin jeńimpazy E.Muzaparov, sondaı-aq nebir dodalarda olja salǵan qaraǵandylyq B.Ahmetbekov, qos qyzylordalyq M.Isaǵabylov pen N.Sálimgereev, dzıýdodan birneshe dúrkin Reseı federasııasynyń jeńimpazy, sambodan Eýropa chempıony reseılik E.Hamzın, halyq yqylasymen «Qara býra» atanǵan mańǵystaýlyq palýan N.Jarylǵapov syndy tıtýly joǵary palýandar bar.
Shırek fınalda alǵashqy bolyp kilemge kóterilgen Mańǵystaýda olja salyp júrgen aıtýly palýan J.Tańatov pen A.Nuǵymarov juby boldy. Bul beldesýde aıqyn basymdyqpen jeńiske jetken A.Nuǵymarov kelesi aınalymǵa joldama aldy. Kelesi jup – reseılik A.Hanbıev pen qyzylordalyq N.Sálimgereev tartysty beldesý jasady, upaı sany aıyrmashylyǵymen Hanbıev kelesi beldesýge ótti. Kelesi R.Ábdirazaqov pen E.Muzaparovtyń beldesýi de tartysty boldy, nátıjesinde E.Muzaparov taza jeńiske jetti. Sondaı-aq, shırek fınaldyń sońǵy juby M.Isaǵabylov pen N.Jarylǵapov 4 mınýt bir-birin ala almaı alysa júrip, bir-bir «búk» upaımen teń túsip kele jatyp, sońǵy sekýndta, ıaǵnı 4 mınýt 59 sekýndta Jarylǵapov Isaǵabylovty taza jeńip, kelesi aınalymǵa ótti.
Aqtyq synǵa ótý úshin aıqasqan A.Nuǵymarov pen A.Hanbıevtiń beldesýinde baǵy janǵan Hanbıev aıqyn basymdylyqpen utyp, fınalǵa shyqty. Ekinshi Muzaparov pen Jarylǵapovtyń kezdesýinde 2 mınýt 37 sekýndta N.Jarylǵapov taza jeńiske qol jetkizdi. Sonan soń ózara beldesken A.Nuǵymarov pen E.Muzaparov aıqasynda Muzaparov taza jeńip, 3-orynǵa qol jetkizdi.
Aqtyq beldesýde A.Hanbıevti 1 mınýt 17 sekýndta taza jeńip, 1-orynǵa kóterilgen mańǵystaýlyq palýan N.Jarylǵapov Aqtaý qalasynan 1 bólmeli páterdiń ıesi atandy. 2-oryn ıegeri reseılik Aslan Hanbıev 1 mln teńgeni, 3-oryn alǵan E.Muzaparov 500 myń teńgeni oljalady.
Aıta ketý kerek, Asta alysqan alyptardyń salmaǵy da osal emes – N.Jarylǵapov 147 kg, A.Hanbıev 130 kg bolsa, E.Muzaparovtyń salmaǵy 95 kg, A.Nuǵymarovtyń salmaǵy 145 kg, al R.Ábdirazaqov 120 kg-da beldesti.
Mańǵystaý oblysy
