Saýd Arabııasynda iri munaı nysandaryna jasalǵan osy shabýyldan keıin munaı óndirisi táýligine eki ese kemigen. Naqtyraq aıtqanda, ádette kúnine 9,8 mıllıon munaı shyǵaratyn eldiń óndirisi 5,7 mıllıon barrelge qysqarǵan.
Álem elderiniń nazaryn aýdaryp, úlken daý týdyrǵan bul shabýyldy Iemenniń soltústigin basyp alǵan shııttik «Ańsar Alla» qozǵalysy moınyna aldy. Hýsıtter qalaǵan kezde Saýd Arabııasynyń kez kelgen núktesine jetýge qaýqarly qarý-jaraǵy saı ekenin aıtyp, ses kórsetti. Sondaı-aq olar Saýd Arabııasynyń Iemendegi shıelenisterge aralasýyn doǵarmasa, taǵy shabýyldaıtyndaryn bildirip, kompanııalar men sheteldik azamattarǵa saq bolýdy eskertti.
Alaıda AQSh-tyń Memlekettik hatshysy Maık Pampeo hýsıtterdiń bul málimdemesin joqqa shyǵaryp, munaı óńdeý zaýyttaryna jasalǵan shabýylǵa Irannyń qatysy baryn aıtyp, kinálady. Onyń sózinen keıin Aq úı basshysy Donald Tramp ta Twitter-degi paraqshasynda «Biz koroldikten bul shabýyldy kim jasaǵany jáne qandaı jaǵdaıda áreket etetinimiz týraly habar kútemiz» dep jazdy. Saýd Arabııasynyń odaqtasy AQSh bul shabýylǵa áskerı is-qımylmen jaýap berý múmkindikterin qarastyryp jatyr.
Al Iran tarapy AQSh-tyń bul kinálaýyn joqqa shyǵardy. Irannyń Syrtqy ister mınıstrliginiń resmı ókili Abbas Mýsavı amerıkalyqtardyń synyqqa syltaý izdep otyrǵandaryn atap ótti. Onyń aıtýynsha, Iemendegi qaqtyǵystardy toqtatýdyń jalǵyz joly – Saýd Arabııasy bastaǵan arab elderiniń áskerı koalısııasynyń sol eldegi shıelenisterge aralasýyn toqtatý.
