Jıynǵa Mádenıet jáne sport mınıstri Aqtoty Raıymqulova, Japonııanyń Qazaqstandaǵy elshisi Tasýhıko Kasaı, «Nevada-Semeı» antııadrolyq qozǵalysynyń kóshbasshysy Oljas Súleımenov, halyqaralyq qozǵalys músheleri, Nobel syılyǵynyń laýreattary qatysty.
Konferensııanyń ashylýynda sóz alǵan Mádenıet jáne sport mınıstri A. Raıymqulova jınalǵandarǵa Qazaqstannyń Tuńǵysh Prezıdenti – Elbasy N. Nazarbaevtyń quttyqtaý hatyn oqyp berdi. Búgingi quttyqtaýy men ıadrolyq synaqty toqtatýǵa qosqan eńbegine rızashylyq bildirgen aqyn, «Nevada-Semeı» antııadrolyq qozǵalysynyń kóshbasshysy O. Súleımenov Elbasy N. Nazarbaevqa qozǵalystyń 30 jyldyǵyna arnap shyǵarylǵan mereıtoılyq medalin tapsyrdy. Sondaı-aq mereıtoılyq medal Mádenıet jáne sport mınıstrine de tapsyryldy.
«Búgingi shara – qozǵalystyń saltanatty mereıtoıy ǵana emes, qazaqstandyq qoǵam men barsha adamzattyń beıbitshilik pen taza ǵalamshar úshin kúresiniń mańyzdy kezeńi. «Nevada-Semeı» halyqaralyq antııadrolyq qozǵalysy belsendileriniń, qoǵamnyń arqasynda 1989 jylǵa josparlanǵan 18 ıadrolyq synaqtyń 11-i jasalmady. Osyndaı kúsh-jiger men batyl qadamdaryńyzben sizder ǵalamdyq sanany ózgertýge úles qosyp, beıbitsúıgishtik ıdeıanyń mańyzdylyǵyn is júzinde dáleldedińizder», - dedi Mádenıet jáne sport mınıstri A. Raıymqulova.
Qazaq jerinde 1949 jyldan 40 jyldaı ıadrolyq synaq júrgizildi. 450-deı synaqtyń saldarynan radıasııalyq sáýleniń kúshti dozasyn alǵan polıgon mańyndaǵy aýyl turǵyndary onyń zardabyn áli kúnge tartyp keledi. O. Súleımenov 1989 jyly ıadrolyq synaqqa qarsy «Nevada-Semeı» qozǵalysyn qurý týraly úndeý tastady. Araǵa 2 jyl salyp, Prezıdent N. Nazarbaevtyń jarlyǵymen polıgon tolyqtaı jabyldy. Keıinnen 29 tamyz – halyqaralyq ıadrolyq qarýǵa qarsy kúres kúni bolyp bekitildi.
