Oral qalalyq prokýratýrasy taratqan málimetke qaraǵanda S. 2015-2019 jyldary eki balasyna alıment tólemeı, ol boıynsha bereshek 3,6 mln teńgege jetken. Sóıtip «Neke (erli-zaıyptylyq) jáne otbasy» týraly kodekstiń 138-babynyń talaby óreskel buzylǵan.
Batys Qazaqstan oblystyq Kámeletke tolmaǵandardyń isteri jónindegi mamandandyrylǵan aýdanaralyq sot materıaldaryna qaraǵanda, boryshker jeke sot oryndaýshysynyń eskertýlerin eskermeı, jumysqa ornalaspaǵan. Tabysynyń úshten bir bóligin alıment retinde tóleý týraly 2010 jylǵy 22 aqpandaǵy sottyń sheshimin qasaqana oryndamaǵan.
Belgili bolǵandaı, S. «jumyssyzbyn» degenmen, 2017 jylǵy 4 qańtarda ol quryltaıshylyq etetin «S» JShS-nyń ústinen jalǵan býhgalterlik qujattardy ótkizý faktisi boıynsha sotqa deıingi tergeý júrgen. Ol is raqymshylyq aktisi qoldanylýyna baılanysty toqtatylǵan.
«Biraq JShS quryltaıshysy S. zańsyz tabys tapqany anyqtaldy» deıdi prokýratýra ókili.
Sóıtip, 2019 jylǵy 10 qyrkúıekte BQO Kámeletke tolmaǵandardyń isteri jónindegi mamandandyrylǵan aýdanaralyq sottyń úkimi boıynsha Qylmystyq Kodekstiń 139-babynda (balalaryn kútip-baǵýǵa arnalǵan qarajatty tóleý jónindegi mindetterdi oryndamaý) kózdelgen qylmysty jasaǵany úshin S. bir jylǵa bas bostandyǵy shektelip, júz saǵat májbúrli eńbekke tartyldy.
Sot aktisi zańdy kúshine engen joq.
