Maqpalsher - Londonda

Kóp nazaryna usynylǵan «AUA» konseptýaldy konserti – adamnyń ishki jan-dúnıesi men ómir syryna úńilýi, bostandyq pen erik jolyndaǵy sony izdenisteri. Osyǵan deıin qazaq tyńdarmandarynyń júregine tereń boılaǵan onyń maqamdy jyrlary talǵampaz batys oqyrmandary tarapynan da zor qyzyǵýshylyqqa ıe boldy. Joba avtory, prodıýseri – aqyn Maqpal Jumabaıdan bólek shyǵarmashylyq ujym qatarynda mýzykalyq jetekshi Beıbit Aqosh, mýzykanttar Oralhan Sádýaqas, Rýslan Jýrbın, Baqyt Jetenov, Álibı Ábdirahmanovtar mýzykalyq súıemel jasap, kórkemdik tutastyqta óner kórsetti. Avtor osynaý keshke arqaý bolǵan «AUA» fılosofııasyn bylaı túsindiredi: «О́mirler, adamdar, taǵdyrlar, sózder, oılar, sezimder, oqıǵalar, qubylystar, qoǵamdar, zamandar, bári-bári tek aýada ǵana qalady. Basqa eshteńe máńgilik emes, tek solardy sińirgen aýa ǵana máńgilik. Endi men aýany ǵana tyńdaımyn, aýany ǵana estımin, aýaǵa ǵana aıtamyn jáne aýany bári úshin keshiremin. Bul – ómirimdegi eń úlken táýekelderimniń biri». Ol óz shyǵarmashylyǵyna Maqpalsher degen ataý berip, birneshe jyldan beri mýzykalyq-poetıkalyq konsepsııa boıynsha jumys istep keledi. О́neri fılosofııalyq, dúnıetanymdyq  oıǵa qurylyp, adam janynyń tereń qatparlaryna boılaıdy.

– London sahnasynda alǵashqy óleńimdi oryndap turǵan sátte adamdardyń kózinen shyn sezim men túsinistik kórdim. Sol sátte jan tynyshtyǵyn sezdim. Sondyqtan kesh boıy esh alańsyz óner kórsettim. Konsert aıaqtalǵan soń qonaqtar taǵy da bir saǵattaı qalyp, keshti, keshtegi oılardy, Maqpalsher-di talqylady. Birneshe adam únsiz ǵana kelip qushaqtady. Londonnyń konseptýaldy konsertten, Maqpalsher-den maǵyna kórgeni – bul úlken sapardyń tek basy ekenin sezdirdi, – degen Maqpal táýekelshil sheshimine qurmetpen qarap, qoldaý kórsetken shyǵarmashylyq komandasy men ata-anasyna, otbasyna alǵysyn bildirdi.

Maqpal Jumabaıdyń konsert barysynda oryndalǵan jyrlarynyń mátini aldyn-ala aǵylshyn tiline aýdarylyp, kesh qonaqtaryna kitapsha retinde tartý etilip, led ekran arqyly tikeleı aýdarmasy qatar kórsetildi.

Mátindi aǵylshyn tiline aýdarǵan belgili aqyn, kásibı aýdarmashy Devıd  Kýk (Ulybrıtanııa) saltanatty keshke qatysyp, aqyn shyǵarmashylyǵyna qatysty jyly pikirde ekenin jetkizdi.

– Meniń qazaq poezııasymen azǵantaı tanystyǵymnan biletinim, bul – mýzykalyq til, aýdarý kezinde osyny qatty eskerdim. Qazaq tiline tán yrǵaǵyn saqtaı otyryp, aǵylshyn tilinde jaqsy bir dúnıe jasaǵym keldi. Sońǵy bir jylda qazaq poezııasynyń aǵylshyn tilindegi nusqalaryn shyǵarýǵa qatysyp kelemin. Maqpaldyń óleńderin túsinýime keletin bolsaq, maǵan onyń qorshaǵan ortaǵa qatysty máseleleri qatty áser etti. Maqpalmen sóılesip otyrǵanda baıqaǵanym, onyń ana týraly aıtyp otyrǵany ol Jer-ana. Mýzykalyq jáne ishki rıfmalyq reńk berýge kóp ýaqyt jumsadym. Maqpaldyń jyrlary kez-kelgen tilde túsinýge bolatyn mańyzdy emosııalar men mańyzdy ıdeıalar týraly shynaıy óleńder, – deıdi ol.

Atalǵan konsertke Qazaqstan Respýblıkasynyń Ulybrıtanııa jáne Soltústik Irlandııa Birikken Koroldigindegi elshiligi qoldaý kórsetti. Keshtiń qurmetti qonaqtarynyń qatarynda Qazaqstan elshiliginiń ókilderi, kórnekti aǵylshyn ónertanýshylary, tanymal ádebıetshiler men aýdarmashylar, Ulybrıtanııada turatyn qazaqtar, ýnıversıtet stýdentteri jáne jergilikti jyrsúıer qaýym qatysty.