Taktıkalyq oqý-jattyǵýdyń aldynda 30238 áskerı bóliminiń batalondyq-taktıkalyq toby jaýyngerlik daıarlyqtyń joǵary deńgeıine keltirilip, oqý-jattyǵý ornyna marsh jasady. Oqý-jattyǵýlarǵa 400-den astam áskerı qyzmetshiler men 50-ge jýyq áskerı tehnıka jumyldyryldy.
Oqý-jattyǵý barysynda áskerı qyzmetshiler shartty aýmaqty oqshaýlaý jáne qarsylasty yǵystyrý boıynsha reıdtik-izdestirý boıynsha is-qımyldardy oryndap, zańsyz qarýlanǵan jasaqty oqshaýlady.
Jattyǵý barysynda basty zeıin jeke quramnyń taktıkalyq áreketteri men urys barysyndaǵy qarýdy durys qoldana bilýine, bólimshe tapsyrmasynyń basqarylýyna bólindi.
«Batys» óńirlik qolbasshylyǵy áskerleri qolbasshysynyń jaýyngerlik daıarlyq jónindegi orynbasary polkovnık Jeńis Maralovtyń aıtýy boıynsha, taktıkalyq oqý-jattyǵýdyń basty maqsaty batalondyq taktıkalyq toptardyń jaýyngerlik úılesimdiligin jetildirý jáne strategııalyq obektilerdi qorǵaý men kolonnalardy ilestirý boıynsha is-qımyldardy pysyqtaý, sonymen qosa qalady urys elementteri, aımaqtaǵy izdestirý jumystary men oqshaýlaý áreketterin jetildirý bolyp tabylady.
Oqý-jattyǵýdyń qortyndysy boıynsha 1 motoatqyshtar rotasynyń komandıri aǵa leıtenant Mıras Nurǵalıev kózge tústi. Ol baǵynyshty jeke quramdy senimdi basqara bilse, sarbazdary taktıkalyq daıarlyqtyń joǵary deńgeıimen erekshelendi.
Batalondyq - taktıkalyq top – bul jaýyngerlik jáne oqý tapsyrmalardy oryndaý maqsatynda qurylatyn Qurlyq áskerleriniń ýaqytsha jasaǵy. Taktıkalyq toptyń negizin motoatqyshtar, tankishiler, áýe-desantshylar men barlaý bólimsheleri quraıdy. Olarǵa qosymsha kúsh retinde Qarýly Kúshterdiń basqa da bólimsheleri kirýi múmkin.
