AÝYLDARDY SÝ ALA BASTADY

Oblystyń Tarbaǵataı, Zaısan, Abaı aýdandary men Semeı qalasynda kún kúrt jylyp, aýyl-aýyldardy sý ala bastasa, Kúr­shimde, kerisinshe, osydan birer kún buryn 30, tipti keı jerlerde 60 santımetrge deıin qar jaýyp, qaýipti odan ári kúsheıtip otyr. Kúr­shim men Úlken Naryn, Kúr­shim-Qaljyr-Terekti aýyldaryna jol 7 naýryzdan beri jabyq. Tar­baǵataı aýdanynyń Jetiaral aýy­lyna sý qaptady. Qyzylkesek, Qarǵyba, Tanamyrza, Qaroı, basqa aýyldardy da sý basý qaýpi bar.  Zaısanǵa qaraı kúrejoldyń ja­byl­ǵanyna biraz ýaqyt ótti. Bir aptadan soń keshe jol áreń taza­landy. Keıbir aýyldarda elek­tr jaryǵy joq, onyń ústine “Shyǵys­ener­go­treıd” kompanııasy  jaryq­t­y jıi óshirýde. Oblys ákimi B.Saparbaev alda­ǵy ýaqytta jaryqty sebepsiz óshir­gen jaǵdaıda olarmen áńgimeniń qysqa bolatynyn qatań eskertti. Oblystyq ákimdikte ótkizilgen shuǵyl keńeste tasqynnyń aldyn-alý jóninde sóz boldy. Tarbaǵataı aýdanynda eki myń­nan astam adam qaýipsiz jerlerge kóshirildi. 19 myń turǵyn sý basý qaýpi aımaǵynda tur. Zaısan aýdanynyń Tasbastaý aýylyndaǵy biraz turǵyndar da qaýipsiz jer­ler­ge kóshirilgen. Aýdannyń basqa aýyl­daryn da sý basý qaýpi kete qoı­ǵan joq. Kendi Altaıdyń Úr­jar, Aıagóz, basqa da birneshe aýdan­­daryndaǵy kóptegen eldi me­ken­der sý tasqynynyń aldyn alý úshin kúndiz-túni tynbaı qaýipsizdik sha­ralaryn atqaryp jatyr. Oblys ákimi B.Saparbaev sońǵy jıynda aýdan, qala ákimderine qadaý-qadaý tapsyrma berip, eger ózderi  basqaratyn eldi mekenderde apatqa jol berip alsa, qatań jaza qolda­na­tynyn shegelep eskertti. Ońdasyn ELÝBAI.