Á. Smaıylovtyń aıtýynsha, 2019 jyldyń 1 qańtarynan bastap «Memlekettik satyp alý týraly» Zańnyń 14-babymen Qazaqstan Úkimetine ulttyq rejımnen, onyń ishinde otandyq taýar óndirýshilerdi qoldaý maqsatynda alyp qoıý quqyǵy belgilengen.
«Osy maqsatta ulttyq rejımnen 2 jyl merzimge 3 taýar pozısııasy boıynsha: avtokólik, transformatorlar, kabeldik ónim boıynsha alyp qoıý belgilendi», — dedi vıse-premer.
Aǵymdaǵy jyldyń shildesinde veb-portalda tapsyrys berýshiler men ónim berýshilerge taýarlardyń shyǵýy týraly sertıfıkattardy, onyń ishinde ST-KZ sertıfıkattaryn engizbeı aktige qol qoıýǵa múmkindik bermeıtin formattyq-logıstıkalyq baqylaý ornatylǵan. Á. Smaıylov atap ótkendeı, bul memlekettik satyp alýlardaǵy jergilikti qamtý boıynsha obektıvti kórinisti aıqyndaýǵa múmkindik beredi jáne monıtorıngti jeńildetedi.
Budan ózge, 2019 jylǵy 1 shildeden bastap jıhaz ónimderi men jeńil ónerkásip taýarlaryn memlekettik satyp alý tek aldyn ala biliktilik irikteý arqyly otandyq taýar óndirýshiler arasynda ǵana júrgiziledi, munda jetkizýshiniń negizgi krıterııi Indýstrııalyq sertıfıkat bolyp tabylady.
«Portal tapsyrys berýshilerge bul taýarlardy basqa tásilmen satyp alýǵa jol bermeıdi, sonymen qatar, jetkizýshiden avtomatty rejımde ındýstrııalyq sertıfıkatty jáne ST-KZ sertıfıkatyn talap etedi», — dedi Á. Smaıylov.
Sonymen qatar, qurylystaǵy jumystardy satyp alý týraly úlgilik sharttar ázirlendi, onyń sheńberinde 2019 jyldyń 1 shildesinen bastap qurylys boıynsha jumystardy satyp alýda tek otandyq taýar óndirýshiler tizilimine engizilgen qurylys materıaldary paıdalanylady.
Sonymen qatar, 2019 jyldyń 1 qyrkúıeginen bastap qurylys jumystaryn satyp alý da tek aldyn ala biliktilik irikteý arqyly júrgiziledi, bul jaǵdaıda qarjylyq turaqtylyq krıterıı bolyp tabylady.
«Bul kórsetkish memlekettik kirister organdarynyń málimettteri boıynsha jáne tek Qazaqstandyq salyq tóleýshiler boıynsha qalyptastyrylatynyn eskersek, atalǵan norma otandyq bıznesti de qoldaıdy», — dedi vıse-premer.
2020 jyldyń 1 qańtarynan bastap memlekettik satyp alýlarda aqparattandyrý obektilerin, sondaı-aq baǵdarlamalyq qamtylym men elektrondyq ónerkásip ónimderin qurý jáne damytý qyzmetteri boıynsha osyǵan uqsas qoldaý sharalary kózdelgen. Tek otandyq ázirleýshiler enetin senim bildirilgen ónim Tiziliminde bolýy aldyn ala biliktilik irikteýge kirýdiń negizgi krıterııi bolyp tabylady.
«Memleket basshysynyń tapsyrmasyn oryndaý aıasynda 2020 jyldan bastap Pılottyq rejımde barlyq memlekettik satyp alýlardy biryńǵaı uıymdastyrýshylarǵa tıisti deńgeıde berýdi kózdeıtin Memlekettik satyp alýdy ortalyqtandyrý engiziledi. Maquldanǵannan jáne naqtylyqsyzdary redaksııalanǵannan keıin bul model búkil respýblıkada qoldanylatyn bolady. Uıymdastyrýshylar sany edáýir tómendeıdi. Ákimshilendirý jeńildetiledi, bul memlekettik satyp alýdaǵy jergilikti qamtýdy tıimdi retteýge múmkindik beredi», — dep túıindedi Á. Smaıylov.
