Qarmaǵyn qamdap, kól jaǵalaı qonaqtaǵan balyqshylardyń jas erekshelikteri ártúrli eken. Eń jasy on segizdegi bozbala bolsa, egdesi – jetpisti alqymdaǵan aqsaqal. Qumarlyq shirkin jasqa qaramaıdy-aý, tegi. Festıvaldyń sharty boıynsha ár balyqshyǵa tup-týra eki saǵat ýaqyt beriledi. Osy ýaqyt ishinde eki ret oryn aıyrbastap, qarmaǵyn, jemin jańartýǵa quqyly.
– Balyq aýlaý festıvalin bıylǵy jyly ekinshi ret ótkizip otyrmyz, – deıdi sharany uıymdastyrýshy Darhan Álimov. Eń basty maqsat – seksen kóldi omyraýyna seksen marjan etip taqqan kórikti Kókshe óńirin, sulý tabıǵatyn, Býrabaıdyń baýyryndaǵy berekeni nasıhattaý. Aldaǵy jyly bastama órisin keńeıtip, respýblıkalyq deńgeıde ótkizemiz be degen oıymyz bar.
Balyqshylar saqadaı saılanyp kelgen-aq eken. Tipti otbasymen qatysyp jatqandar da bar.
–Másele balyqty kóp ustaýda emes, – deıdi Alekseı Pırovskıı, – eń bastysy, tylsym tabıǵattyń qushaǵynda ózgeshe bir sezimge bólenip, bir jasap qalý. Asylynda, bul da sporttyń bir túri. Birinshiden, jarys bolǵan soń arqań qozady, onyń ústine shalt qımyl kóbeıedi.
Jarys qorytyndysy boıynsha tuńǵysh balyq, eń iri balyq atalymdary boıynsha qarmaǵy qara sýdan bos qaıtpaǵandar marapattaldy. Aýlanǵan eń iri balyqtyń salmaǵy úsh kelige taıaý boldy.
Aqmola oblysy
