-Qurylys jumysy keń saraıdyń kórinisin qalaı ózgertse, taǵdyryn da solaı ózgertedi. Memleket te solaı. Ol kóp jyldardy talap etedi. Eldiń Tuńǵysh Prezıdenti retinde 30 jylǵa jýyq ýaqyt boıy Qazaqstan Respýblıkasy dep atalatyn memleketti qurý, eldi basqarý baqyty buıyrdy. Osynshama ýaqyt boıy halyq maǵan eldi bulyńǵyr jolda kósh bastaýyma senim artty. Osynshama ýaqyt eldi basqaryp kelip, bıyl óz erkimmen ókilettigimizdi toqtatý týraly sheshim qabyldadym. Arnaıy qabyldanǵan zańǵa sáıkes, Elbasy – Tuńǵysh Prezıdent mártebem bar jáne qazir ony júzege asyryp jatyrmyn, - dedi Elbasy.
Budan ári Nursultan Nazarbaev Qazaqstannyń táýelsizdik alǵannan keıingi jetistikterdi atady.
-Osy ýaqyttyń ishinde elimiz álemniń damyǵan 50 eliniń qataryna qosyldy. Jalpy ishki ónim 18 ese ósip, respýblıka ekonomıkasynyń kólemi búkil Ortalyq Azııa elderiniń JIО́-sinen 2 ese asa tústi. Halyqtyń jan basyna shaqqandaǵy tabysy dollarmen eseptegende 9 ese artyp, kedeıshilik deńgeıi 40 paıyzdan 4 paıyzǵa deıin tómendedi. Sońǵy 20 jylda 320 mlrd dollar tikeleı shetel ınvestısııasy tartyldy,- dedi Tuńǵysh Prezıdent.
Aıta keteıik, Eýrazııalyq memleketterdiń zańnamalyq organdary basshylarymen jan-jaqty dıalog ornatý maqsatynda uıymdastyrylyp jatqan forým bıyl Qazaqstanda birinshi ret ótip jatyr. Buǵan deıin Eýrazııa elderi parlamentteri tóraǵalarynyń keńesi Reseıde, Ońtústik Koreıada jáne Túrkııa Respýblıkasynda ótken edi.
Forýmǵa qatysýshylar qatarynda EQYU men UQShU parlamenttik assambleıalary, Parlamentaralyq odaq, Azııa parlamenttik assambleıasy, Halyqtyń qonystanýy jáne damýy jónindegi parlamentarıılerdiń Azııalyq forýmy, Eýropalyq parlament, Azııadaǵy ózara is-qımyl jáne senim sharalary keńesi, Islam yntymaqtastyq uıymy parlamenttik odaǵy, TMD PAA, ShYU syndy uıymdar bar.
