Jıyn barysynda Sh.Shaıahmetov atyndaǵy «Til-qazyna» ulttyq ǵylymı ortalyǵynyń ádiskerleri Ulttyq ulandyq til mamandaryn qazaq tilin jańa álipbı negizinde oqytýdyń qyr-syrlarymen tanystyrý úshin dárister ótkizip, ózara tájirıbe almasty. Jıyn sońynda sertıfıkattar tabystaldy.
Memlekettik tildiń qoldaný aıasyn keńeıtý jolynda Ulttyq ulannyń «Ońtústik» óńirlik qolbasshylyǵynyń áskerı bólimderinde de qyrýar jumystar atqarylýda. Qujattar men is-qaǵazdardy júrgizýde, pármenderdi berýde memlekettik tilge basymdyq berilip keledi. Onymen qosa osy jyldyń mamyr aıynda áskerı bólimderde ózge ult áskerı qyzmetshileriniń qatysýymen «Memlekettik til – meniń tilim» baıqaý-saıysynyń 1-kezeńi, maýsym aıynda óńirlik qolbasshylyqta baıqaý-saıystyń 2-kezeńi uıymdastyrylyp ótkizildi. Atap aıtarlyǵy, saıysqa qatysýshy ózge ult áskerı qyzmetshileri ózderin bıyl erekshe qyrlarynan kórsetip, mol daıyndyqpen kelgendikterin dáleldedi. Jeńimpazdar «Ońtústik» óńirlik qolbasshylyǵy qolbasshysynyń arnaıy dıplomdarymen jáne baǵaly syılyqtarmen marapattaldy.
– Bıylǵy jyly óńirlik qolbasshylyq áskerı bólimderinde memlekettik tildi kırıllısadan latyn grafıkasyna negizdelgen álipbıge kóshirý jolynda da qyrýar jumys atqaryldy. Áskerı bólimderdegi memlekettik rámizder, qyzmetter ataýlary, kórneki nasıhat quraldary birtindep latyn grafıkasyna aýystyrylýda, – deıdi 28237 áskerı bólimi tárbıe bóliminiń ofıseri – til mamany aǵa leıtenant Aıdos Baıshaǵyrov.
Jáne bıyl qyrkúıek aıynda Ulttyq ulan áskerinde Qazaqstan halyqtarynyń Tilderi kúni merekesine oraı «Tilge qurmet – elge qurmet» aksııasynyń bastaý aldy. Osyǵan oraı áskerı bólimderde túrli is-sharalar uıymdastyrylýda, atap aıtar bolsaq «Ońtústik» óńirlik qolbasshylyǵynyń áskerı bólimderinde «Til – tatýlyq tiregi» taqyrybynda aqparattyq saǵattar, Elbasy saǵattary jáne jergilikti jerlerdegi Tilderdi damytý ortalyqtary, kitaphanalarymen birlestikte túrli is-sharalar ótkizilýde. Áskerı bólimniń bólinisterinde Til merekesine qatysty qabyrǵa baspalary jasalyp ilindi. Onymen qosa óńirlik qolbasshylyq áskerı bólimderiniń til mamandary jergilikti qalalardaǵy túrli ǵylymı konferensııalar men semınarlarǵa qatysyp, arnaıy sertıfıkattarǵa ıe boldy.
Bárin aıt ta birin aıt demekshi, memlekettik tildi órkendetý jolynda jasalyp jatqan bundaı jumystar osymen toqtamaq emes. Bıylǵy atqarylǵan jumystardyń kórsetkishi, ıaǵnı ulandyqtardyń memlekettik tilge qosqan úles salmaǵy ótken jyldardaǵymen salystyrǵanda birshama óskendigin baıqatady.
ALMATY
