Qazaqstan Prezıdenti Qasym-Jomart Toqaev BUU Bas Assambleıasynyń 74-sessııasy aıasynda josparlanǵan barlyq ekijaqty kezdesýlerden keıin Turaqty damý máseleleri jóninde joǵary deńgeıdegi forýmǵa qatysty. Memleket basshysy sharaǵa qatysýshy spıkerler arasynan birinshi bolyp sóz aldy.
Qasym-Jomart Toqaev óz baıandamasynda 2030 jylǵa deıingi turaqty damý maqsattary – adamzatqa áleýmettik, tehnologııalyq jáne ekonomıkalyq jetistikterdiń ıgiligi barshaǵa ortaq bolatyn kemel keleshekke jetýdiń naqty jol kartasyn usyný ekenin atap ótti.
Sonymen qatar Memleket basshysy Qazaqstan halyqaralyq qoǵamdastyqtyń Turaqty damý maqsattaryna qol jetkizý jóninen artta qalyp bara jatqanyna alańdaýshylyq bildiretinin málimdedi. Qasym-Jomart Toqaev bul máseleni sheshý úshin aldaǵy on jyldyqta tıisti nátıjege qol jetkizý maqsatynda naqty sheshim qabyldaý qajettigin aıtty.
– О́z elimniń saıası, ekonomıkalyq, áleýmettik jáne ekologııalyq saıasatynyń 2030 jylǵa deıingi turaqty damý mindettemelerine tolyqtaı sáıkes keletinin aıta alamyn. Álemdik naryqtyń áralýandyǵyna qaramastan Qazaqstannyń ekonomıkasy tabandy ósimdi saqtap qalady, – dedi Qazaqstan Prezıdenti.
Qasym-Jomart Toqaev Qazaqstannyń turaqty ekonomıkalyq ósimge, ınklıýzıvti qoǵam qurýǵa, taza ekologııany saqtaýǵa jáne tıimdi ári esep beretin ınstıtýttar qurýǵa qol jetkize alatynyna senim bildirdi.
Memleket basshysy osy mindetterdi júzege asyrý aıasynda halyqtyń únine qulaq asatyn memleket qurý tujyrymdamasynyń qolǵa alynǵany týraly aıtty. Onyń basty mindeti – úkimet pen halyq arasyndaǵy dıalogty qamtamasyz etý. Sonymen qatar Memleket basshysy bilim júıesin jańǵyrtýdyń, «jasyl» jáne sıfrly ekonomıkany jáne qarqyndy túrde ınfraqurylymdy damytýdyń mańyzdylyǵyna basa nazar aýdardy. Onyń aıtýynsha, bul baǵyttar jalpy adamzattyń órkendeýi men ekonomıkalyq jetistikterge jetýdiń qýatty qozǵaýshy kúshi bolmaq.
Qazaqstan Prezıdenti bizdiń eldiń tájirıbesinde Turaqty damý maqsattarynyń 80%-y Qazaqstannyń strategııalyq baǵdarlamalarynda kórsetilgenin atap ótti.
– 2018 jyly Qazaqstan BUU ınstıtýttarymen ózara tyǵyz is-qımyl jasaı otyryp, Turaqty damý maqsattaryna qol jetkizýge yqpal etetin «ınstıtýsıonaldyq arhıtektýra» engizdi, onyń ishinde Basqarýshy keńes te bar. Turaqty damý maqsattary jóninen ótken alǵashqy forým 2019 jylǵy Astana ekonomıkalyq forýmynyń negizgi is-sharasyna aınaldy. Bıyl shilde aıynda biz alǵash ret erikti túrde, Qazaqstannyń jetistikteri men sheshilmegen máseleleri jáne aldaǵy on jyldyqta jasalýy tıis múmkindikter boıynsha ulttyq sholý jasadyq, – dep atap ótti Qasym-Jomart Toqaev.
Memleket basshysy Turaqty damý maqsattarynyń, jalpy planetanyń kelbetin qalyptastyratyn ózara baılanysyn eskerte otyryp, jekelegen sanattardyń nemese elderdiń jetistigine qanaǵat tutyp qarap otyrýǵa bolmaıtynyn aıtty.
Bul máselede Memleket basshysy Qazaqstannyń Turaqty damý maqsattaryn aımaqtyq jáne halyqaralyq deńgeıde belsendi júzege asyryp jatqanyna toqtaldy. Osy oraıda Qasym-Jomart Toqaev birqatar sharany iske asyrýdy usyndy.
Memleket basshysynyń aıtýynsha, birinshiden, Turaqty damý maqsattaryna bólinetin qarjy resýrstarynyń tıimdi jumsalýyn qamtamasyz etý qajet.
Ekinshiden, Qasym-Jomart Toqaev Qazaqstannyń Tuńǵysh Prezıdenti Nursultan Nazarbaevtyń bastamasymen qurylǵan azyq-túlik qaýipsizdigi jónindegi Islam Yntymaqtastyq Uıymynyń shóleıttený, jasyl jelekti qalpyna keltirý, erozııa, tuzdaný, sondaı-aq áleýmettik qaýipsizdikti qamtamasyz etý máselelerin sheshýge baǵyttalǵan maqsattarynyń mańyzdylyǵyn atap ótti. Ol jaqyn bolashaqta IYU-ǵa múshe 57 memlekettiń barlyǵy osy bastamaǵa qosylatynyna senim bildirdi. Taǵy bir pármendi shara retinde Prezıdent Ortalyq Azııa memleketteri men Aýǵanstan úshin Turaqty damý ortalyǵyn qurýdy atap ótti. Onyń aıtýynsha, bul Turaqty damý maqsattaryn tek Qazaqstanda ǵana emes, sonymen qatar basqa da Ortalyq Azııa memleketteri men Aýǵanstanda júzege asyrýdy jedeldetetin edi.
