Jıynǵa BUU-nyń Qazaqstandaǵy turaqty úılestirýshisi Norımasa Shımomýra, BUU-nyń halyqty qonystandyrý salasyndaǵy qorynyń Qazaqstandaǵy ókili (IýNFPA), Qyrǵyzstan men Túrikmenstan úshin eldik dırektory Djýlııa Valeze, Qazaqstandaǵy BUU Damý baǵdarlamasynyń turaqty ókili Iаkýp Berısh, «BUU-Áıelder» qurylymynyń ókili Ileın Konkıevıch jáne BUU-nyń Qazaqstandaǵy Balalar qorynyń (IýNISEF) ókili Artýr van Dızen qatysty.
Aldymen sóz alǵan Norımasa Shımomýra ekologııa máselesin jahandyq deńgeıde kótergen Nıý-Iorktegi BUU Bas assambleıasynyń 74-sessııasynyń mán-mańyzyna qysqasha toqtalyp, oǵan Qazaqstan Prezıdenti Qasym-Jomart Toqaevtyń qatysqanyn erekshe atap ótti.
– Qazaqstan 2015 jyldan bastap Turaqty damý maqsattaryn (TDM) oryndaýǵa yntaly ekenderin kórsetip keledi. Búginde TDM-nyń 80% mejesi Qazaqstannyń damýynyń strategııalyq memlekettik qujattarymen úndestik tapqan. Bul elde TDM-dy úılestirý jóninde ulttyq mehanızm qurylǵan. Qazaqstandaǵy BUU júıesi eldiń álemdegi eń damyǵan 30 eldiń qataryna qosylýǵa umtylysyn qoldaıdy. Biz burynǵydaı Turaqty damý salasyndaǵy jahandyq kún tártibi Qazaqstanǵa órkendeý jolyndaǵy reformalaryn, 2050 jylǵa deıingi strategııasyn júzege asyrýǵa septigin tıgizedi, – dedi N.Shımomýra.
IýNFPA ókili Djýlııa Valeze Qazaqstanda Jastar jyly belgilenip, jastardyń jan-jaqty damýyna erekshe kóńil bólinip, jaǵdaı jasalyp jatqanyn, sondaı-aq kelesi jyldyń Volonterler jyly bolyp jarııalanýyn osy baǵyttaǵy is-sharalardyń maqsatty jalǵasy ekenin aıtty.
Al Iаkýp Berısh BUU Damý baǵdarlamasy Qazaqstanǵa ınstıtýsıonaldyq damytý men bıoalýandyqty damytýǵa aıtarlyqtaı úles qosyp jatqanyn jetkizdi. Buǵan qosa ol bizdiń eldiń jasyl ekonomıkaǵa kóshý tujyrymdamasyn iske asyryp jatqanyn, sybaılas jemqorlyqqa qarsy is-qımyldy belsendi júrgizetinin, ákimshilik, memlekettik qyzmet, quqyqtyq reformalardy qolǵa alǵanyn jáne Prezıdenttiń jastar kadrlyq rezervi jasaqtalatynyn málimdedi.
Sonymen qatar bul jıynda adam quqyqtarynyń qorǵalýy, qandaı da bir kemsitýshilikke jol bermeý, ınklıýzıvti qoǵam qurý, ana men bala ólimi týraly keńinen sóz qozǵaldy. Máselen, IýNISEF ókili Artýr van Dızen óz sózinde Qazaqstannyń basty jetistiginiń biri retinde bala óliminiń 5 esege azaıǵanyn atady.
