«Ulttyq biregeılikti saqtaý: ulttyq kod, ulttyq mádenıet» taqyrybyna oı tolǵatyp, pikir talastyrǵan sýretshiler bas qosýy qylqalammen órilgen beıneler kórmesine ulasty.
Sımpozıýmǵa Ázirbaıjan, Reseı, Túrkııa, Qytaı, Tájikstan, Qyrǵyztan, О́zbekstan jáne respýblıkanyń basqa da aımaqtarynan 25 sýretshi qatysty. Shara aıasynda qonaqtar oblys ortalyǵyndaǵy Kórkemóner galereıasyna, M.Tynyshpaev atyndaǵy tarıhı-ólketaný mýzeıine jáne I.Jansúgirov ádebı memorıaldyq mýzeıine ekskýrsııa jasady.
– О́ner – halyq tarıhynyń shejiresi. Sóz, áýen, qolóner, beıneleý óneri adam ómiriniń san ǵasyrlyq tarıhynan kóptegen nárse kórsetip, alýan túrli syr shertedi. Kez kelgen qoǵamnyń tarıhı damýy men órkendeýi sol eldiń óneri men mádenıetine tikeleı baılanysty. Oǵan dúnıe júzine keńinen tanymal, bir top týyndylarymen óz Otanyn álemge pash etken Leonardo da Vınchı, Mıkelandjelo, Ábilhan Qasteev, Oral Tańsyqbaev, Aısha Ǵalymbaeva syndy tulǵalardyń týyndylary kýá, – deıdi oblystyq mádenıet, arhıvter jáne qujattama basqarmasynyń basshysy Márlen Kólbaev.
