Atalǵan jıynǵa akademık, Memlekettik syılyqtyń laýreaty Seıit Qasqabasov, aqyn Nesipbek Aıt, jazýshy Aldan Smaıyl, professor Marat Ábsámetov, til janashyrlary Muhambedııa Ahmetov, Kamal Álpeıisova, qoǵam qaıratkeri Saılaý Batyrshauly syndy birqatar zııaly qaýym ókilderi qatysty.
«Til-Qazyna» ortalyǵynyń bas dırektory Álibek Asqar sóz alyp, qazaq álipbıin latyn grafıkasyna kezeń-kezeńimen kóshirýge arnalǵan is-sharalar josparyna sáıkes atqarylyp jatqan jumystar retin tanystyryp, ortalyqtyń memlekettik tildiń mártebesin kóterý, ony ǵylym tiline aınaldyrý, jańa ulttyq álipbıdi halyqqa nasıhattaý baǵytynda qoǵamnyń ártúrli áleýmettik toptary arasynda, ǵylymı ortada, til mamandary, ádiskerler, memlekettik qyzmetkerler arasynda túsindirý jumystary júıeli túrde ótkizilip júrgenin jetkizdi. Sondaı-aq jazýshy, Memlekettik syılyqtyń laýreaty, qoǵam qaıratkeri Tólen Ábdik, Parlament Májilisiniń depýtaty Fahrıddın Qarataev, Mádenıet jáne sport vıse-mınıstri Nurqısa Muratuly oqytý synyptarynyń sapaly, nátıjeli jumys jasaýyna senim bildirip, ulttyq jazýdyń negizin qalyptastyryp berýdiń bolashaqta til salamattyǵyn saqtaýda týyndaıtyn kez kelgen máseleni sheshýde asa mańyzdy ekenin atap ótti.
Qazaqstan Respýblıkasy Mádenıet jáne sport mınıstrligi Til saıasaty komıteti tóraǵasynyń orynbasary Aınur Myrzabekova oqytý synyptaryn ashýdyń negizgi talaptaryna toqtala otyryp, Tuńǵysh Prezıdent – Elbasy Nursultan Ábishulynyń qazaq tilin jańa álipbıge kóshirýge baılanysty Jarlyǵynan keıin Premer-Mınıstr ókimimen «Qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar jospary» bekitilgenin atap ótti.
– Úkimet qaýlysymen «Til-Qazyna» ulttyq ǵylymı-praktıkalyq ortalyǵy» qurylyp, elimizdegi latyn álipbıin engizýge baılanysty jumystar osy mekeme arqyly júzege asyrylýda. Atap aıtqanda, Ulttyq komıssııa janynan qurylǵan jumys toptarynyń jumysyn úılestirý, latyn álipbıin engizýge baǵyttalǵan memlekettik tapsyrmalardy iske asyrý. 2019 jyl – «Ádisteme jyly». Jańa emle erejelerin oqytý boıynsha Nur-Sultan qalasynda 72 saǵattyq biliktilik arttyrý kýrstary, óńirlerde dárister men 12 saǵattyq semınarlar uıymdastyrylýda, – dedi Til saıasaty komıteti tóraǵasynyń orynbasary Aınur Myrzabekova. Onyń aıtýynsha, «Til-Qazyna» ortalyǵynan bilimin jetildirgen fılolog mamandar óz óńirinde til úıretý kýrstaryn jalǵastyratyn bolady. Atalǵan kýrs 2025 jylǵa deıin júrgizilmek. Sondaı-aq ortalyq mamandary búginge deıin respýblıka boıynsha 500-deı adamǵa jańa álipbıdiń emle erejesin úıretken.
– Jańa álipbıge kóshý barysynda biz oqytý sapasyna erekshe mán berýimiz qajet. Qazirgi kezeńde oqytýdyń qaı túri bolsyn jańa ınnovasııalyq tehnologııalarǵa qurylǵany jón. Osy retten kelgende, búgin ashylatyn oqý ǵımaraty osyndaı jańa talaptarmen jabdyqtalǵan. Sonymen birge oqý ǵımaratyndaǵy tehnıkalyq qurylǵylar onlaın semınar ótkizýge de mol múmkindik beredi,– dep sózin túıindedi ol.
Ashylǵan oqytý synyptary kýrs ótkizýge qajetti quraldarmen, tehnıkalarmen tegis jabdyqtalǵan. Dárishanalarda respýblıka boıynsha, sonymen qatar sheteldegi ǵalymdar, ádiskerlermen baılanys ornatýǵa, onlaın semınar ótkizýge múmkindik bar. Semınar, kýrstardy jańa qazaq álipbıiniń emle erejesin ázirlegen ǵalymdar ótkizedi.
Zamanaýı jobalardy júzege asyrýǵa kúsh jumyldyryp otyrǵan «Til-Qazyna» ortalyǵynyń memlekettik tildi jáne latyn grafıkasy negizindegi qazaq tiliniń álipbıi men jańa emle erejesin tanystyrý, úırený, jazý jáne oqý daǵdylaryn qalyptastyrý maqsatynda keshendi is-sharalar josparyn turaqty iske asyryp keledi. Sondyqtan respýblıka kóleminde jańa latyn grafıkasymen jazylǵan jazba tilimizdiń júıesin, emle erejeleriniń qurylymyn, emle normalarynyń ǵylymı negizderin túsindire alatyn bilikti mamandar daıyndaý – kún tártibinde turǵan ózekti máselelerdiń biri.
