Kezinde áýesqoı rıngte tabysty óner kórsetip, respýblıkalyq jáne halyqaralyq jarystarda jeńis tuǵyryna kóterilgen aıtýly qazaq boksshysy biraz ýaqyt Dúnıejúzilik boks serııasy (WSB) dodasynda «Astana arlandary» sapynda kúsh synasty. Osydan týra tórt jyl buryn, ıaǵnı 2015 jyldyń 3 qazanynda Erbosynulynyń kásipqoılar arasyndaǵy óziniń tusaýkeser kezdesýin ótkizgeni de esimizde. Sol ýaqyttan beri 12 márte sharshy alańǵa kóterilip, barlyq básekede jeńiske jetti. Segiz qarsylasyn nokaýtqa jiberdi. Qazirgi kezde ol – ekinshi orta salmaq dárejesi boıynsha WBC Asian Continental, WBA International jáne WBO Global nusqalarynyń altyn belbeýiniń ıegeri. Osyndaı eleýli tabystarynyń arqasynda Aıdos Erbosynuly búgingi tańda aıtýly reıtıngte «TOP-3» boksshynyń qataryna qosylyp otyr.
Al qazirgi kezde WBA reıtınginde ulybrıtanııalyq Djon Raıder jeke-dara kósh bastap tur. Ol – «ýaqytsha» chempıon tájiniń ıegeri. Ekinshi oryndy WBA Continental nusqasynyń altyn belbeýiniń ıesi reseılik Fedor Chýdınov ıelenýde.
