Osy sporttyq sharaǵa oraı keshe InterContinental Almaty qonaq úıinde baspasóz máslıhaty uıymdastyryldy. Kópshilik aldynda sóz alǵan Qanat Islam: «Alataý baýraıynda ótetin osyndaı keremet jarys qarsańynda bas qosyp, jaǵymdy jańalyqtarymyzben bólisýdi qup kórip otyrmyz. Bizdiń alǵa qoıǵan bir ǵana maqsatymyz bar – óz jerimizde osyndaı joǵary deńgeıdegi jekpe-jekter uıymdastyrý arqyly Qazaqstannyń kásipqoı boksynyń deńgeıin kóterý. Osy baǵytta biraz sharýa atqardyq. Bul rette bizge «Qazaq Promotions» kompanııasynyń bas dırektory Darhan Muqtarbek kóp qoldaý kórsetýde. Sóz oraıy kelgende, aıtýly azamatqa zor alǵys bildiremiz. Qazaq jastary arasynda daryndy bylǵary qolǵap sheberleri jeterlik. Oǵan kózimiz áldeqashan jetken. Biraq ár salmaqta bir ǵana boksshynyń Olımpıadaǵa baratyny belgili. Al sonda qalǵandary ne isteý kerek? «Bulaq kórseń, kózin ash» dep atalarymyz tegin aıtpaǵan. Bizdiń de kózdegenimiz sol. Daryndy jas órenderdiń kóleńkede qalyp qoımaý úshin biz óz elimizde boks keshterin jıi ótkizýimiz kerek. Sonda jastardyń deńgeıi ósedi, Qazaqstannyń kásipqoı boks órkendeıdi».
35 jastaǵy Qanat Islamnyń júrip ótken joly jankúıerlerdiń kóz aldynda. Osy kúnge deıin kásipqoı rıngte 26 kezdesý ótkizgen qandasymyz barlyǵynda jeńiske jetip, 21 básekeni nokaýtpen aıaqtady. Ol birneshe nusqa boıynsha altyn belbeýdiń ıegeri. Al onyń qarsylasy jaıynda ne bilemiz? Ýolter Kaýtondokva da 1984 jyly dúnıege kelgen. Ol Namıbııada týyp-óskenmen, bul kúnderi AQSh-tyń týy astynda óner kórsetýde. Tusaýkeser kezdesýin Kaýtondokva 2013 jyldyń qyrkúıek aıynda ótkizdi. Barlyǵy 19 márte rıngke kóterilip, 18 ret basymdyq tanytty. 17 qarsylasyn esinen tandyrdy. О́ziniń sporttyq karerasynda ol tek bir ret jeńilistiń kermek dámin tatty. Atap aıtsaq, byltyrǵy jyldyń qazan aıynda birneshe beldi nusqa boıynsha álem chempıony atanyp otyrǵan ataqty amerıkalyq Andrade Demetrıýstan upaı sanymen ǵana utyldy. Qazirgi kezde Ýolter Kaýtondokva WBO nusqasy boıynsha «TOP-10» boksshynyń tiziminde 9 orynda tur.
Baspasóz máslıhatynda «Qazaq Promotions» kompanııasynyń bas dırektory Darhan Muqtarbek aldaǵy jekpe-jektiń mańyzdylyǵyna toqtala kele, búgingi tańda Qazaqstanda kásipqoı boksty damytý maqsatynda qandaı aýqymdy jumystar atqarylyp jatqany jaıynda keńinen baıandady.
Almatyda ótetin boks keshinde barlyǵy 10 jekpe-jek ótkizilip, bul básekelerde Qazaqstannyń órenderinen bólek, AQSh, Qytaı jáne Eýropa elderinen keletin tanymal boksshylar kúsh synasady. Atalǵan sporttyq sharany Qazaqstandaǵy alǵashqy QP TV strımıngtik platforma 150 memleketke tikeleı efır taratady.
